2026-yil 6-noyabr kuni O‘zbekiston Respublikasi davlat mustaqilligining 35 yilligini nishonlash doirasida Jahon iqtisodiyoti va diplomatiya universiteti huzuridagi Diplomatik akademiyada «Diplomatik izohli lug‘at» hamda «Diplomatiya qadimgi davrlardan hozirgi kungacha» nomli nashrlarning taqdimoti bo‘lib o‘tdi.

Tadbirda davlat va jamoat arboblari, diplomatiya sohasi vakillari, yetakchi olimlar, professor-o‘qituvchilar, tadqiqotchilar hamda universitet jamoasi ishtirok etdi.

Tadbirni Diplomatik akademiya direktori, siyosiy fanlar doktori, professor A.Xaydarov kirish so‘zi bilan ochib, mazkur nashrlarning milliy diplomatiya maktabini rivojlantirish, diplomatik ta’limning ilmiy-uslubiy asoslarini mustahkamlash va sohaviy ilmiy adabiyotlar bazasini boyitishdagi ahamiyatini ta’kidladi.

Taqdimot davomida «Diplomatik izohli lug‘at»ning yaratilish maqsadi, ilmiy-amaliy ahamiyati hamda o‘zbek tilidagi diplomatik terminologiyani tizimlashtirishdagi o‘rni yoritildi. Nashr diplomatiya va xalqaro munosabatlar sohasiga oid tushunchalarni o‘zbek tilida izchil va aniq ifodalash, milliy diplomatik terminologiyani rivojlantirish hamda ta’lim va ilmiy tadqiqotlar uchun yagona terminologik asosni shakllantirishga xizmat qiladi.

Shuningdek, A.Xaydarov va JIDU professori, iqtisodiyot fanlari doktori I.Mavlanov hammuallifligidagi «Diplomatiya qadimgi davrlardan hozirgi kungacha» o‘quv qo‘llanmasining mazmuni va asosiy yo‘nalishlari taqdim etildi. Unda diplomatiyaning tarixiy taraqqiyoti, nazariy-huquqiy asoslari, O‘zbekiston diplomatiyasining shakllanishi va rivojlanishi, shuningdek, zamonaviy diplomatiyaning ommaviy, madaniy, raqamli va iqtisodiy kabi yo‘nalishlari yoritilgan.

Ta’kidlanganidek, mazkur nashrlar O‘zbekiston mustaqilligi yillarida diplomatiya sohasida to‘plangan bilim va tajribani tizimlashtirishga qaratilgan bo‘lib, mazmuni va qamrovi jihatidan Markaziy Osiyoda ushbu yo‘nalishdagi dastlabki ixtisoslashgan ilmiy nashrlar qatoridan o‘rin oladi. Shu bilan birga, ular o‘zbek tilining xalqaro munosabatlar va diplomatik muloqotdagi ilmiy-amaliy imkoniyatlarini kengaytirishga xizmat qiladi.

Muhokamalarda Oliy Majlis Senati Raisining birinchi o‘rinbosari, JIDU rektori S.Safoyev hamda xalqaro munosabatlar, diplomatiya va gumanitar fanlar sohasidagi yetakchi olim va mutaxassislar ishtirok etdilar. So‘zga chiqqanlar nashrlarning ilmiy va amaliy qiymati, diplomatik kadrlar tayyorlash tizimidagi o‘rni hamda ulardan ta’lim va ilmiy-tadqiqot jarayonlarida foydalanish istiqbollariga alohida e’tibor qaratdilar.

Tadbir yakunida mazkur nashrlarning diplomatik ta’lim sifatini oshirish, milliy diplomatik terminologiyani rivojlantirish, ilmiy-tadqiqot salohiyatini mustahkamlash va O‘zbekistonning ilmiy-diplomatik merosini boyitishdagi ahamiyati qayd etildi.

Taqdimot JIDU rektori S.Safoyevning yakuniy so‘zi bilan nihoyasiga yetdi.

Joriy yilning 2-noyabr kuni Konrad Adenauer nomidagi jamg‘armaning (Germaniya) Markaziy Osiyo bo‘yicha mintaqaviy dasturi rahbari Andre Algermissen bilan Diplomatik akademiya Xalqaro muammolarning amaliy tahlili kafedrasi mudiri, professor R. Alimovning uchrashuvi bo‘lib o‘tdi.

Suhbat davomida Jamg‘armaning mintaqadagi faoliyatining asosiy yo‘nalishlari, shuningdek, 2017-yildan buyon O‘zbekiston va umuman Markaziy Osiyo mamlakatlarida ro‘y berayotgan keng ko‘lamli siyosiy va ijtimoiy-iqtisodiy o‘zgarishlarni inobatga olgan holda uning ustuvor vazifalari transformatsiyasi muhokama qilindi.

Ta’kidlanganidek, bugungi kunda Jamg‘arma faoliyati mintaqaviy integratsiyani rivojlantirish, amalga oshirilayotgan islohotlarni qo‘llab-quvvatlash, yoshlar yetakchiligi salohiyatini yuksaltirish hamda mintaqaviy xavfsizlikning dolzarb masalalari bo‘yicha ekspert muloqotini mustahkamlashga qaratilgan. Shuningdek, Jamg‘armaning mintaqaning yetakchi tahliliy markazlari bilan hamkorlikda amalga oshirayotgan xalqaro tashabbuslari, jumladan, Afg‘oniston bo‘yicha Termiz muloqoti, Germaniya va Markaziy Osiyo tahliliy markazlari forumi hamda Farg‘ona tinchlik muloqotining ahamiyati alohida qayd etildi.

Uchrashuvda, shuningdek, Jamg‘arma va Jahon iqtisodiyoti va diplomatiya universiteti huzuridagi Diplomatiya akademiyasi hamda Xalqaro istiqbolli tadqiqotlar instituti o‘rtasidagi hamkorlikni rivojlantirish masalalariga alohida e’tibor qaratildi.

Tomonlar ilmiy-tadqiqot va ekspert-tahliliy sohalarda tizimli hamkorlikni yo‘lga qo‘yish, qo‘shma xalqaro tadbirlarni tashkil etish, akademik almashinuvlarni kengaytirish, shuningdek, xalqaro munosabatlar, mintaqaviy barqarorlik va xavfsizlikning dolzarb masalalarini muhokama qilishga yetakchi xorijiy olimlar va mutaxassislarni jalb etishdan manfaatdor ekanliklarini bildirdilar. Ilmiy va ekspert muloqotini chuqurlashtirish, qo‘shma tadqiqot tashabbuslarini amalga oshirish hamda xalqaro akademik hamkorlikni mustahkamlashga xizmat qiluvchi barqaror platformani shakllantirish muhimligi ta’kidlandi.

O‘zbekiston Respublikasi davlat mustaqilligining 35 yilligi munosabati bilan Jahon iqtisodiyoti va diplomatiya universiteti huzuridagi Diplomatik akademiyada “Diplomatik izohli lug‘at” va “Diplomatiya qadimgi davrlardan hozirgi kungacha” nomli darsligi taqdimoti bo‘lib o‘tadi.

Mazkur nashrlar O‘zbekiston mustaqilligi yillarida diplomatiya sohasida yaratilgan ilk ixtisoslashtirilgan asarlardan bo‘lib, Markaziy Osiyoda ham ushbu yo‘nalishdagi dastlabki nashrlar qatoriga kiradi.

Tadbir doirasida nashrlarning milliy diplomatiya maktabini rivojlantirish, diplomatik kadrlar, soha ekspertlari va tadqiqotchilarni tayyorlash, shuningdek, o‘zbek tilining xalqaro munosabatlar va diplomatiya sohasidagi nufuzini oshirishdagi ilmiy-amaliy ahamiyati muhokama qilinadi.

Barcha qiziquvchilarni mazkur taqdimotda ishtirok etishga taklif etamiz!

Sana: 2026-yil 6-noyabr
Vaqt: 10:00
Manzil: Jahon iqtisodiyoti va diplomatiya universiteti, tadbirlar zali (B-203).

2026-yil 24-sentabrdagi “Ishonch” gazetasining 40-sonida Jahon iqtisodiyoti va diplomatiya universiteti huzuridagi Diplomatik akademiya direktori, siyosiy fanlar doktori, prof. A.Xaydarov bilan intervyu e’lon qilindi.

Intervyuda zamonaviy diplomatiyani rivojlantirish, yangi avlod diplomatlarini tayyorlash, diplomatik ta’lim tizimini takomillashtirish hamda milliy diplomatiya maktabini shakllantirish masalalari ko‘rib chiqildi. Shuningdek, O‘zbekistonning xalqaro aloqalari kengayib borayotgan sharoitda diplomatik kadrlar oldiga qo‘yilayotgan yangi talablar, iqtisodiy diplomatiyaning ortib borayotgan ahamiyati, texnologiyalar, investitsiyaviy va transport hamkorligi masalalariga alohida e’tibor qaratildi.

Suhbat davomida, shuningdek, Diplomatik akademiyani rivojlantirish, ta’lim, fan va diplomatik amaliyotning o‘zaro bog‘liqligi, diplomatik faoliyatda sun’iy intellekt va raqamli tahliliy vositalardan foydalanish, shuningdek, xalqaro akademik hamkorlikni kengaytirish masalalari muhokama qilindi.

Intervyuning to‘liq matni 2026-yil 24-sentabrdagi “Ishonch” gazetasining 40-sonida e’lon qilingan.

2026-yil 24-sentabr kuni Jahon iqtisodiyoti va diplomatiya universitetida “Markaziy Osiyo - Yaponiya” tahliliy markazlar forumining ikkinchi kuni bo‘lib o‘tdi. Forum “Markaziy Osiyo va Yaponiya taraqqiyoti hamda hamkorligi bo‘yicha umumiy qarashlarni ilgari surish” mavzusiga bag‘ishlandi.

Nufuzli xalqaro ekspertlar forumida Markaziy Osiyo davlatlari, Yaponiya va Ozarbayjonning yetakchi tahliliy markazlari, ilmiy-tadqiqot institutlari, davlat va biznes doiralari vakillari, olimlar hamda ekspertlar ishtirok etdi. Forumda Jahon iqtisodiyoti va diplomatiya universiteti huzuridagi Diplomatik akademiya vakili ham qatnashdi.

Tadbir davomida Markaziy Osiyo mamlakatlari va Yaponiya o‘rtasidagi hamkorlik istiqbollari, xususan, transport va raqamli o‘zaro bog‘liqlikni rivojlantirish, yangi texnologiyalar va sun’iy intellekt, ta’lim, gumanitar aloqalar hamda ekspertlar muloqotini rivojlantirish masalalari muhokama qilindi.

Forum yakunida ishtirokchilar mintaqalararo ekspertlik va akademik hamkorlikni yanada kengaytirish, qo‘shma ilmiy-tadqiqot tashabbuslari va ta’lim loyihalarini rivojlantirish muhimligini ta’kidladilar.

2026-yil 4-sentabr kuni Nyu-Dehlida Hindiston Bosh vaziri Narendra Modining yaqinda O‘zbekistonga amalga oshirgan davlat tashrifiga bag‘ishlangan davra suhbati bo‘lib o‘tdi. Tadbir O‘zbekiston Respublikasining Hindistondagi Elchixonasi tomonidan Hindiston-Markaziy Osiyo jamg‘armasi (ICAF) bilan hamkorlikda tashkil etildi.

Tadbirda O‘zbekiston Respublikasining Hindistondagi Favqulodda va Muxtor Elchisi S.Rustambayev, Jahon iqtisodiyoti va diplomatiya universiteti huzuridagi Diplomatik akademiya direktori, professor A.Xaydarov, ICAF direktori va MERI Xalqaro tadqiqotlar markazi rahbari, professor R.Dvivedi, Hindistonning O‘zbekistondagi sobiq Elchisi, Hindiston Tashqi ishlar vazirligining sobiq kotibi, ICAF vitse-prezidenti G.Sharma, shuningdek, Hindiston ekspert va akademik doiralari vakillari ishtirok etdilar.

Davra suhbati davomida Bosh vazir Narendra Modining 2026-yil 29–30-avgust kunlari O‘zbekistonga amalga oshirgan davlat tashrifining ahamiyati hamda ikki mamlakat o‘rtasidagi strategik sheriklikni yanada rivojlantirish istiqbollari muhokama qilindi.

O‘z nutqida professor A.Xaydarov davlat tashrifi O‘zbekiston-Hindiston munosabatlarini rivojlantirishda muhim bosqich bo‘lganini hamda ikki mamlakat o‘rtasidagi sheriklikning tobora ortib borayotgan strategik ahamiyatini aks ettirganini ta’kidladi. Ikki tomonlama munosabatlarning gumanitar va ta’lim yo‘nalishlariga alohida e’tibor qaratildi.

Shu nuqtai nazardan, professor A. Xaydarov O‘zbekiston Diplomatik akademiyasi va Hindiston Tashqi ishlar vazirligining Sushma Svaraj nomidagi Diplomatik xizmat instituti o‘rtasida imzolangan O‘zaro anglashuv memorandumining ahamiyatini ta’kidladi. Mazkur memorandum institutsional hamkorlikni yo‘lga qo‘yish, tajriba almashish, professional treninglar, seminarlar va akademik dasturlarni amalga oshirish uchun yangi imkoniyatlar ochib beradi.

Elchi S.Rustambayev O‘zbekiston va Hindiston o‘rtasidagi iqtisodiyot, savdo, sog‘liqni saqlash, madaniyat va ta’lim sohalaridagi hamkorlikning jadal rivojlanayotganini ta’kidladi. Shuningdek, 2030-yilga qadar ikki mamlakat o‘rtasidagi tovar ayirboshlash hajmini 5 milliard AQSh dollariga yetkazish vazifasi alohida qayd etildi.

Yakunida ishtirokchilar erishilgan kelishuvlarni samarali amalga oshirish, biznes, ta’lim va texnologiyalar sohasidagi almashinuvlarni kengaytirish, shuningdek, raqamli transformatsiya, "yashil" energetika, muhim strategik minerallar va innovatsiyalar kabi istiqbolli yo‘nalishlarda hamkorlikni rivojlantirish muhimligini ta’kidladilar. Mintaqalar, universitetlar, ilmiy-tadqiqot muassasalari va ishbilarmon doiralar o‘rtasidagi hamkorlikni yanada mustahkamlash O‘zbekiston va Hindiston o‘rtasidagi strategik sheriklikni yangi bosqichga olib chiqishga xizmat qilishi qayd etildi.

2026-yil 5-sentabr kuni «Pravda Vostoka» gazetasida Jahon iqtisodiyoti va diplomatiya universiteti huzuridagi Diplomatik akademiya direktori, professor A. Xaydarov bilan intervyu e’lon qilindi. Unda O‘zbekiston Respublikasining mustaqillik yillaridagi asosiy yutuqlari, 2016-yildan keyingi davrda mamlakat tashqi siyosatida yuz bergan tub va prinsipial o‘zgarishlar, shuningdek, tashqi siyosatning yaqin yillardagi rivojlanishini belgilovchi ustuvor vazifalar haqida so‘z yuritilgan.

Intervyuning to‘liq matni «Pravda Vostoka» gazetasining 2026-yil 5-sentabrdagi sonida e’lon qilingan.

Hindistonning Vir Arjun gazetasida JIDU huzuridagi Diplomatik akademiya direktori, professor A.Xaydarovning “Hindiston mustaqil taraqqiyot yo‘lida: milliy tiklanishdan global hamkorlik sari” nomli maqolasi chop etildi.

Maqolada Hindistonning ijtimoiy-iqtisodiy va siyosiy rivojlanishining muhim jihatlari, mamlakatning zamonaviy xalqaro munosabatlardagi o‘rni, shuningdek, xalqaro hamkorlikni kengaytirish istiqbollari tahlil qilingan.

Ayniqsa, Hindistonning Markaziy Osiyo davlatlari bilan o‘zaro hamkorligini mustahkamlash hamda siyosiy, iqtisodiy, ilmiy-ta’limiy va boshqa sohalarda o‘zaro manfaatli sheriklikni yanada rivojlantirish masalalariga alohida e’tibor qaratilgan.

Mazkur nashr xalqaro hamkorlik masalalariga bo‘lgan qiziqishning ortib borayotganini aks ettirib, O‘zbekiston va Hindiston o‘rtasidagi akademik hamda ekspertlik aloqalarini kengaytirishga xizmat qiladi.

Hurmatli Sadir Nurgʻojoyevich!

Hurmatli davlat rahbarlari!

Qirgʻiziston Prezidenti hurmatli Sadir Nurgʻojoyevich Japarovga norasmiy uchrashuvimizni oʻtkazish tashabbusi va “Qirgʻiz dengizi” – goʻzal Issiqkoʻl sohilidagi iliq qabul uchun samimiy minnatdorlik bildiraman.

Ikki kun davomida Qirgʻizistonda boʻlar ekanman, Sizning rahbarligingizda amalga oshirilayotgan keng koʻlamli islohotlar natijalari menda katta taassurot qoldirdi. Mamlakat iqtisodiy rivojlanish boʻyicha yuqori surʼatlarni namoyish etmoqda, uning xalqaro nufuzi muttasil oshib bormoqda.

Sizni va qardosh qirgʻiz xalqini Qirgʻizistonning BMT Xavfsizlik Kengashining doimiy boʻlmagan aʼzosi etib saylangani bilan tabriklaymiz.

Turkmaniston Prezidenti Serdar Gurbanguliyevich Berdimuhamedovga ham Maslahat uchrashuvlari formatida samarali raislik qilayotgani uchun minnatdorlik bildiraman.

Hurmatli uchrashuv ishtirokchilari!

Bugun biz davlatlarimiz mustaqilligining 35 yillik bayramlarini nishonlash arafasida yigʻilib turibmiz. Shu yillar mobaynida har bir mamlakat davlatchilikning shakllanishi, iqtisodiy oʻsish va milliy tiklanishning oʻziga xos va betakror yoʻlini bosib oʻtdi.

Ilgari tarqoq boʻlgan Markaziy Osiyo bugungi kunda birgalikdagi saʼy-harakatlarimiz natijasida taraqqiyotning umumiy maqsadlari yoʻlida birlashmoqda.

Shu bilan birga, murakkab va oldindan bashorat qilib boʻlmaydigan bugungi xalqaro voqelik bizdan yanada qatʼiyat bilan harakat qilishni va yanada yaqin muvofiqlashtiruvni talab etmoqda.

Ozarbayjonning Maslahat uchrashuvlari formatiga qoʻshilishi oʻzaro hamkorligimizni sifat jihatidan yangi – makromintaqaviy darajaga olib chiqmoqda.

Biz uchun Markaziy Osiyo, Janubiy Kavkaz va yaqin qoʻshnimiz – Afgʻonistonni birlashtiruvchi yagona taraqqiyot makonini shakllantirish borasida tarixiy imkoniyat ochilmoqda. Ushbu vaziyatdan toʻliq foydalanib, birgalikdagi saʼy-harakatlarimiz bilan Yevroosiyoning qoq yuragida barqaror rivojlanish, oʻzaro bogʻliqlik va yaxshi qoʻshnichilik uchun mustahkam poydevor yaratishimiz zarur.

Hurmatli hamkasblar!

Mintaqaviy hamkorlikning barqaror arxitekturasini shakllantirishga oʻtish vaqti keldi. Uning tuzilishi hamkorlikning samarali institutlari, tarmoq idoralarining yaqin munosabatlari, hududlarning toʻgʻridan-toʻgʻri aloqalari hamda va rivojlanishning asosiy yoʻnalishlaridagi uzoq muddatli qoʻshma dasturlarga tayanishi zarur.

Mintaqamizning xalqaro subyekt sifatidagi maqomini mustahkamlagan holda davlatlararo tashkilotlar va “Markaziy Osiyo plyus” formatlari doirasida oʻzaro muvofiqlashtiruvni kuchaytirish lozim.

Savdo-iqtisodiy va transport sohasidagi oʻzaro bogʻliqlikni mustahkamlash, uzluksiz sanoat-texnologik zanjirlarni kengaytirish, umumiy raqamli xizmatlarni rivojlantirish hamda investitsiya platformalarini ishga tushirish boʻyicha kelgusi qadamlarni puxta ishlab chiqish lozim.

Markaziy Osiyo taʼlim, ilm-fan va katta maʼlumotlar sohasida innovatsiyalar boʻyicha raqobatbardosh xabga aylanishi kerak. Bunga kadrlar salohiyati, sunʼiy intellekt texnologiyalari, data-markazlar va energetika quvvatlarini birlashtirgan yaxlit infratuzilmani yaratish orqali erishish mumkin.

Atrof-muhitni muhofaza qilish har doim mintaqaviy kun tartibining ustuvor yoʻnalishi boʻlib kelgan va shunday boʻlib qoladi. Yagona tabiiy makonimizda yuzaga kelayotgan tahdidlar davlat chegaralarini tan olmaydi, shunday ekan, ularga javob choralari ham umumiy boʻlishi kerak.

Joriy yilgi yozning anomal darajada issiq kelishi iqlim oʻzgarishi allaqachon iqtisodiyot, suv va energetika xavfsizligi, odamlarning salomatligi va hayot sifatiga toʻgʻridan-toʻgʻri taʼsir qiladigan omilga aylanib borayotganini yana bir bor koʻrsatdi. Ana shunday yangi xavf-xatarlarga birgalikda moslashish boʻyicha uzoq muddatli yechimlarni topish muhimdir.

Hamkorligimizning oʻzgarmas ustuvor yoʻnalishlari orasida gumanitar aloqalar muhim ahamiyat kasb etadi. Xalqlarimiz asrlar davomida yonma-yon yashagan, savdo-sotiqni rivojlantirgan, bilim va madaniy anʼanalar bilan oʻzaro almashgan.

Zamonaviy hamkorlik chuqurlashgani sari hamjihatlik tuygʻusi ham mustahkamlanmoqda. Umummintaqaviy oʻziga xoslik, xalqlarimizning milliy oʻzligi saqlangan holda bosqichma-bosqich shakllanmoqda.

Ishonchim komil, ushbu sohadagi ishlarning mohiyati sifat jihatidan oʻzgarishi xalqlarimiz oʻrtasidagi birlik, hamjihatlik va oʻzaro tushunish tuygʻusini mustahkamlaydi.

Aziz doʻstlar!

Hamkorligimizni yanada mustahkamlash boʻyicha bugun aytib oʻtilgan tashabbus va takliflarni toʻliq qoʻllab-quvvatlayman.

Fursatdan foydalanib, Qozogʻiston Respublikasi Prezidenti hurmatli Qasim-Jomart Kemelevich Toqayev va butun qozoq xalqiga yangi Qurultoyga saylovlar muvaffaqiyatli oʻtishini tilab qolaman.

Soʻzimning yakunda bizning umumiy kuchimiz – birlik, oʻzaro ishonch va birgalikdagi yaratuvchanlikka qatʼiy sadoqatimizda ekanini yana bir bor taʼkidlab oʻtmoqchiman.

Barchangizga mustahkam sogʻliq, tinchlik va yangi yutuqlar, mamlakatlarimiz xalqlariga esa farovonlik va ravnaq tilayman.

Oʻzbekiston Respublikasi Prezidenti Shavkat Mirziyoyev 31-iyul kuni Qirgʻiziston Respublikasining Choʻlponota shahrida boʻlib oʻtgan Markaziy Osiyo va Ozarbayjon davlat rahbarlarining norasmiy uchrashuvida ishtirok etdi.

Tadbirda Ozarbayjon Respublikasi Prezidenti Ilhom Aliyev, Qozogʻiston Respublikasi Prezidenti Qasim-Jomart Toqayev, Qirgʻiz Respublikasi Prezidenti Sadir Japarov, Tojikiston Respublikasi Prezidenti Emomali Rahmon va Turkmaniston Prezidenti Serdar Berdimuhamedov ham qatnashdilar.

Davlat rahbarlari Markaziy Osiyo va Ozarbayjon mamlakatlari va xalqlarining barqaror rivojlanishi, iqtisodiy taraqqiyoti, xavfsizligini taʼminlash hamda farovonligini yuksaltirishga doir dolzarb masalalar yuzasidan fikr almashdilar.

Oʻzbekiston yetakchisi soʻzining avvalida norasmiy sammitni oʻtkazish tashabbusi va Issiqkoʻl sohilidagi iliq qabul uchun Qirgʻiz Respublikasi Prezidenti Sadir Japarovga samimiy minnatdorlik bildirdi.

Turkmaniston Prezidenti Serdar Berdimuhamedovga ham Maslahat uchrashuvlari formatida samarali raislik qilayotgani uchun tashakkur izhor etildi.

Mintaqa mamlakatlari mustaqilligining 35 yillik bayramlarini nishonlash arafasida har birining davlatchilikni barpo etish, iqtisodiy oʻsish va milliy tiklanish borasida erishgan muvaffaqiyatlariga yuksak baho berildi.

– Birgalikdagi saʼy-harakatlarimiz natijasida ilgari tarqoq bo‘lgan Markaziy Osiyo bugungi kunda taraqqiyotning umumiy maqsadlari yoʻlida birlashmoqda, – dedi Prezidentimiz.

Mamlakatimiz yetakchisi murakkab va oldindan bashorat qilib boʻlmaydigan xalqaro voqelikni tahlil qilar ekan, uchrashuv ishtirokchilarini qatʼiyat bilan harakat qilish va oʻzaro muvofiqlashuvni yanada kuchaytirishga chaqirdi. Davlatimiz rahbari taʼkidlaganidek, Ozarbayjonning Maslahat uchrashuvlari formatiga qoʻshilishi oʻzaro hamkorlikni sifat jihatidan yangi – makromintaqaviy darajaga olib chiqmoqda.

– Biz uchun Markaziy Osiyo, Janubiy Kavkaz va yaqin qoʻshnimiz – Afgʻonistonni birlashtiruvchi yagona taraqqiyot makonini shakllantirish borasida tarixiy imkoniyat ochilmoqda, – dedi Oʻzbekiston yetakchisi.

Prezidentimiz Markaziy Osiyo davlatlari va Ozarbayjon oʻrtasida barqaror rivojlanish, oʻzaro bogʻliqlik va yaxshi qoʻshnichilik uchun mustahkam zamin yaratish maqsadida mintaqaviy hamkorlikning ustuvor yoʻnalishlari boʻyicha nuqtayi nazarini bayon qildi.

Avvalo, mintaqaviy hamkorlikning barqaror arxitekturasini shakllantirishga oʻtish muhimligi taʼkidlandi. Uning tuzilishi hamkorlikning samarali institutlari, tarmoq idoralarining yaqin munosabatlari, hududlarning toʻgʻridan-toʻgʻri aloqalari hamda rivojlanishning asosiy yoʻnalishlaridagi uzoq muddatli qoʻshma dasturlarga tayanishi zarur.

Mintaqaning xalqaro subyekt sifatidagi maqomini mustahkamlash uchun davlatlararo tashkilotlar va “Markaziy Osiyo plyus” formatlari doirasida o‘zaro muvofiqlashtiruvni kuchaytirish lozimligi qayd etildi.

Savdo-iqtisodiy va transport sohasidagi oʻzaro bogʻliqlikni mustahkamlash, uzluksiz sanoat-texnologik zanjirlarni kengaytirish, umumiy raqamli xizmatlarni rivojlantirish hamda investitsiya platformalarini ishga tushirish boʻyicha kelgusi qadamlarni puxta ishlab chiqish talab etiladi.

Markaziy Osiyoni kadrlar salohiyati, sunʼiy intellekt texnologiyalari, data-markazlar va energetika quvvatlarini birlashtirgan yaxlit infratuzilmani yaratish orqali taʼlim, ilm-fan va innovatsiyalar boʻyicha raqobatbardosh xabga aylantirish masalasi istiqbolli vazifalar qatorida koʻrsatib oʻtildi.

Atrof-muhitni muhofaza qilish har doim mintaqaviy kun tartibining ustuvor yoʻnalishi boʻlib kelgani va shunday boʻlib qolishi alohida taʼkidlandi. Yagona tabiiy makonimizda yuzaga kelayotgan tahdidlar chegara bilmaydi, shunday ekan ularga javob choralari ham umumiy boʻlishi kerak.

– Joriy yilgi yozning anomal darajada issiq kelishi iqlim oʻzgarishi allaqachon iqtisodiyot, suv va energetika xavfsizligi, odamlarning salomatligi va hayot sifatiga toʻgʻridan-toʻgʻri taʼsir qiladigan omilga aylanib borayotganini yana bir bor koʻrsatdi. Ana shunday yangi xavf-xatarlarga birgalikda moslashish boʻyicha uzoq muddatli yechimlarni topish muhimdir, – dedi davlatimiz rahbari.

Hamkorlikning oʻzgarmas ustuvor yoʻnalishlari orasida gumanitar aloqalarga alohida eʼtibor qaratildi. Mintaqa xalqlari asrlar davomida yonma-yon yashagan, savdo-sotiqni rivojlantirgan, bilim va madaniy anʼanalar bilan oʻzaro almashgan. Hamkorlik chuqurlashgani sari hamjihatlik tuygʻusi ham mustahkamlanmoqda.

– Umummintaqaviy oʻziga xoslik, xalqlarimizning milliy oʻzligi saqlangan holda bosqichma-bosqich shakllanmoqda. Ishonchim komil, ushbu sohadagi ishlarning mohiyati sifat jihatidan oʻzgarishi xalqlarimiz oʻrtasidagi birlik, hamjihatlik va oʻzaro tushunish tuygʻusini mustahkamlaydi, – dedi mamlakatimiz yetakchisi.

Oʻzbekiston Prezidenti nutqining yakunida umumiy kuchimiz – birlik, oʻzaro ishonch va birgalikdagi yaratuvchanlikka qatʼiy intilishda ekanini yana bir bor taʼkidladi.

Tadbirda Markaziy Osiyo davlatlari va Ozarbayjon yetakchilari ham soʻzga chiqib, mintaqaviy hamkorlikning bugungi holati va uni rivojlantirish istiqbollari yuzasidan oʻz qarashlarini bayon qildilar.

Sammit yakunida Choʻlponota deklaratsiyasi qabul qilindi.

Oʻzbekiston Respublikasi Prezidenti Shavkat Mirziyoyevni I darajali “Manas” ordeni bilan taqdirlash marosimi boʻlib oʻtdi.

Qirgʻiz Respublikasining yuksak mukofotini davlatimiz rahbariga Prezident Sadir Japarov topshirdi.

Oʻzbekiston yetakchisi qardosh Qirgʻiziston Prezidenti va xalqiga chuqur minnatdorlik bildirib, ushbu mukofotni ikki xalq oʻrtasidagi koʻp asrlik doʻstlik va yaxshi qoʻshnichilik rishtalarini mustahkamlash borasidagi birgalikdagi saʼy-harakatlar hamda Oʻzbekiston va Qirgʻiziston munosabatlarini yangi tarixiy bosqich – ittifoqchilik darajasiga olib chiqishga qaratilgan mushtarak intilishlarning yuksak eʼtirofi sifatida qabul qilishini taʼkidladi.

1996-yilda taʼsis etilgan “Manas” ordeni Qirgʻiz Respublikasining oliy davlat mukofotlaridan biri hisoblanadi. Respublika va xorij fuqarolariga davlatchilik va xalqaro hamkorlikni mustahkamlash, xalqlar oʻrtasida tinchlik, doʻstlik va oʻzaro anglashuv rishtalarini rivojlantirishga qoʻshgan ulkan hissasi uchun beriladi.

Oliy darajadagi muzokaralar yakunida Oʻzbekiston Respublikasi Prezidenti Shavkat Mirziyoyev va Qirgʻiz Respublikasi Prezidenti Sadir Japarov Ittifoqchilik munosabatlari toʻgʻrisidagi shartnomani imzoladilar.

Shuningdek, davlat rahbarlari huzurida ikki tomonlama hujjatlarni almashish marosimi boʻldi. Shu jumladan:

– Oʻzbekiston – Qirgʻiziston davlat chegarasining uchastkalari toʻgʻrisida shartnoma;

– “Chashma” bulogʻidan birgalikda foydalanish toʻgʻrisida bitim;

– Davlat ijtimoiy sugʻurtasi va pensiya taʼminoti toʻgʻrisida bitim;

– Oliy taʼlim sohasidagi kreditlarni oʻzaro tan olish toʻgʻrisida bitim;

– Davlat chegarasi orqali oʻtkazish punktlari toʻgʻrisidagi hukumatlararo bitimga oʻzgartirish va qoʻshimchalar kiritish haqida bayonnoma;

– Fuqarolarning oʻzaro kelib-ketishlari toʻgʻrisidagi hukumatlararo bitimga bayonnoma;

– Qirgʻiz Respublikasining Issiqkoʻl viloyati hududida joylashgan kurort-rekreatsiya xoʻjaligi obyektlari toʻgʻrisidagi bitimga bayonnoma;

– 2026-2027-yillarga moʻljallangan madaniyat sohasidagi tadbirlar rejasi;

– 2026-2027-yillarga moʻljallangan turizm sohasidagi qoʻshma harakatlar rejasi;

– Qirgʻiz Respublikasi Issiqkoʻl viloyati Ton tumanida joylashgan “Boʻston” pansionati toʻgʻrisida shartnoma;

– 2026-2027-yillarga moʻljallangan agrosanoat majmuasi sohasidagi amaliy chora-tadbirlar rejasi.