Joriy yilning 7-10 fevral kunlari Markaziy Osiyo xalqaro instituti direktori J.Vaxabov boshchiligidagi delegatsiyaning Afg‘onistonga tashrifi amalga oshirildi.

Delegatsiya tarkibida Jahon iqtisodiyoti va diplomatiya universiteti huzuridagi Diplomatik akademiya direktori A.Xaydarov ham ishtirok etdi.

Tashrif davomida Afg‘oniston tashqi ishlar vaziri Mavlaviy Amirxon Muttaqiy bilan uchrashuv, shuningdek, mamlakatning boshqa tegishli tashkilotlari va ilmiy-tadqiqot markazlari vakillari bilan qator ikki tomonlama uchrashuvlar o‘tkazildi. Xususan, 9 fevral kuni Afg‘oniston Tashqi ishlar vazirligi huzuridagi Strategik tadqiqotlar markazida davra suhbati tashkil etildi.

Tadbir doirasida savdo-iqtisodiy hamkorlik, transport-logistika yo‘laklarini rivojlantirish, gumanitar aloqalar hamda tahliliy markazlar o‘rtasidagi institutsional muloqotni mustahkamlash masalalari muhokama qilindi.

Mazkur tashrif O‘zbekiston va Afg‘oniston o‘rtasidagi ilmiy-tahliliy aloqalarni yanada mustahkamlash, o‘zaro ishonchni oshirish hamda mintaqaviy barqarorlikni ta’minlashga xizmat qiladi.