2024-yil 21-oktabr kuni Toshkent shahridagi “Renessance Hall” majmuasida Xalqaro hamkorlik tashabbuslari haftaligi doirasida “Qashshoqlikdan farovonlik sari” mavzusida xalqaro davra suhbati tashkil etildi. Tadbirda xorijiy hamkorlar, jumladan ekspertlar, xalqaro va mintaqaviy tashkilotlar, shuningdek, fuqarolik jamiyati institutlari, JIDU Diplomatik akademiyasi vakillari ishtirok etdi.

Davra suhbatida kambag‘allikni kamaytirish bo‘yicha amalga oshirilayotgan ishlar va kelgusida yangicha yondashuvlar muhokama qilindi. Qayd etilganidek, 2020 yildan boshlab qashshoqlikka qarshi kurash mamlakat siyosatining ustuvor yo‘nalishlaridan biri etib belgilandi.

So‘zga chiqqanlar joriy yilda “Ko‘p o‘lchovli qashshoqlik indeksi” standartlari va xalqaro tajriba o‘rganilgani, bu borada O‘zbekistondan metodologiya ishlab chiqilgani, kambag‘allik darajasini aniqlash uchun minimal iste’mol xarajatlarini hisoblash metodikasi joriy etilganini ta’kidladi.

Yig‘ilishda so‘zga chiqqan xalqaro tashkilotlar vakillari xalqaro hamjamiyat O‘zbekistonning qashshoqlikka qarshi samarali kurash olib borayotganini e’tirof etishini va bu borada u bilan hamkorlikni yanada oshirishga tayyorligini bildirdi.

Mazkur anjuman xorijlik mutaxassislar bilan tajriba almashish uchun yangi platforma yaratdi. Bundan tashqari, kelgusida jahon miqyosida qashshoqlikni qisqartirishda yangi qadam bo‘ladigan amaliy taklif va tavsiyalar bildirildi.