O‘zbekiston Respublikasi Prezidentining 2022-yil 23-iyuldagi PQ-330-son qaroriga muvofiq, 2026-yil 12–31-yanvar kunlari JIDU huzuridagi Diplomatik akademiyada navbatdagi malaka oshirish kurslari tashkil etildi.

Kurslarda Jahon iqtisodiyoti va diplomatiya universiteti, Toshkent davlat sharqshunoslik universiteti va Toshkent gumanitar universiteti professor-o‘qituvchilari ishtirok etdi (jami 31 kishi).

O‘quv mashg‘ulotlari doirasida xalqaro munosabatlar, xalqaro iqtisodiyot va xalqaro huquq sohalaridagi zamonaviy bilimlar, shuningdek, innovatsion pedagogik texnologiyalar, xalqaro indeksatsiyalangan jurnallarga maqola yozish, xalqaro grantlar bilan ishlash, ta’lim jarayonida sun’iy intellektdan foydalanish, HEMIS va Moodle tizimlarida ish, strategik fikrlash va tizimli tahlil bo‘yicha ma’ruza va seminarlar o‘tkazildi.

Shuningdek, Hindiston TIVning Diplomatik xizmati instituti (SSIFS) bilan hamkorlikda “Diplomatiyada kiberxavfsizlik va sun’iy intellekt” mavzusida 3 kunlik maxsus onlayn kurs tashkil etildi. Unda zamonaviy diplomatiyada raqamli texnologiyalar va sun’iy intellektni qo‘llashning dolzarb masalalari taqdim etildi.

Mashg‘ulotlar JIDU va Diplomatik akademiya professor-o‘qituvchilari, tegishli vazirlik mutaxassislari hamda Hindistonning yetakchi olim va ekspertlari tomonidan olib borildi. Kursni muvaffaqiyatli tamomlagan tinglovchilarga 2026-yil 5-fevral kuni sertifikatlar topshirildi.