Koʻksaroy qarorgohida Oʻzbekiston Respublikasi Prezidenti Shavkat Mirziyoyev va Chexiya Respublikasi Bosh vaziri Andrey Babishning tor doirada va ikki mamlakat delegatsiyalari ishtirokida muzokaralari boʻlib oʻtdi.

Oʻzbekiston bilan Chexiya oʻrtasidagi amaliy hamkorlikning joriy holati va uni yanada rivojlantirish istiqbollari muhokama qilindi.

Uchrashuv avvalida mamlakatimiz yetakchisi ushbu tashrif Oʻzbekiston – Chexiya munosabatlari tarixida sifat jihatidan yangi bosqichni boshlab berishini alohida taʼkidladi.

Barcha sohalarda hamkorlik jadal rivojlanib borayotgani mamnuniyat bilan qayd etildi. Hukumatlar, vazirliklar va idoralar darajasida yaqin aloqalar oʻrnatildi, ishbilarmonlik va gumanitar almashinuvlar faollashdi.

Parlamentlarda “Doʻstlik guruhlari” tashkil etilgan. Hukumatlararo komissiya samarali ishlamoqda.

Keyingi yillarda tovar ayirboshlash qariyb ikki barobarga oshdi. Mamlakatimizda Chexiya kapitali ishtirokida 37 ta qoʻshma korxona muvaffaqiyatli faoliyat yuritmoqda. Bir qator yangi kooperatsiya yoʻnalishlari boʻyicha ish olib borilmoqda.

Oʻzaro savdo hajmini oshirishga alohida eʼtibor qaratildi. Tovar ayirboshlashni, shu jumladan, mahsulot turlarini kengaytirish orqali 1 milliard dollarga yetkazish vazifasi qoʻyildi.

Birgalikdagi savdoni ragʻbatlantirish maqsadida Chexiyada Oʻzbekistonning birinchi sertifikatlash filiali tashkil etilmoqda. Chexiyalik hamkorlar bilan “Yevro-6” standartidagi avtomobillarni sertifikatlash va kvant etaloni boʻyicha zamonaviy laboratoriya qurilmoqda.

Chexiyaning yetakchi kompaniyalari bilan mashinasozlik, “yashil” energiya, geologiya va muhim xomashyo, kimyo, farmatsevtika hamda boshqa sohalarda loyihalarni amalga oshirishni oʻz ichiga olgan Texnologik hamkorlik dasturini ishlab chiqish boʻyicha kelishuvga erishildi.

Shuningdek, infratuzilmani rivojlantirish va “aqlli” shaharlar yaratish, muhandislik ishi va raqamlashtirish sohalarida kooperatsiya uchun mavjud istiqbollar qayd etildi.

Xususan, kuni kecha boʻlib oʻtgan Oʻzbekiston – Chexiya biznes forumida eʼlon qilingan loyihaviy tashabbuslar qoʻllab-quvvatlandi.

Tomonlar Eksport kreditlarini sugʻurtalash agentligi va Chexiya Eksport bankining Oʻzbekistonda loyihalarni amalga oshirishni qoʻllab-quvvatlash niyatini olqishladilar.

Iqtisodiy kun tartibidagi barcha masalalarni ilgari surish uchun Ishbilarmonlar kengashini tuzish va Hukumatlararo komissiyaning keyingi yigʻilishini shu yil avgust oyida Toshkentda oʻtkazish taklif qilindi.

Madaniy-gumanitar sohada, shu jumladan, qoʻshma diplom dasturlari doirasida taʼlim va akademik almashinuvni kengaytirishdan ikki tomon ham manfaatdor ekani tasdiqlandi.

Oʻzaro madaniyat va kino kunlari, koʻrgazma va konsertlarni muntazam ravishda oʻtkazish, shuningdek, mamlakatlar oʻrtasida sayyohlar oqimini koʻpaytirish muhimligi taʼkidlandi.

Shu maqsadda ikki mamlakat poytaxtlari oʻrtasida toʻgʻridan-toʻgʻri aviareysni qayta tiklash masalasi koʻrib chiqiladi.

Tartibli mehnat migratsiyasi sohasidagi hamkorlik istiqbollari muhokama qilindi.

Xalqaro kun tartibi yuzasidan ham fikr almashildi.

Yakunda qabul qilingan qarorlarni oʻz vaqtida amalga oshirish boʻyicha qoʻshma “yoʻl xaritasi”ni ishlab chiqishga kelishib olindi.

2026-yil 21-aprel kuni Jahon iqtisodiyoti va diplomatiya universiteti huzuridagi Diplomatik akademiyada Toshkent davlat sharqshunoslik universiteti va Diplomatik akademiya magistrantlari ishtirokida “Yaqin Sharqdagi zamonaviy geostrategik vaziyat va O‘zbekiston” mavzusida ilmiy-amaliy seminar bo‘lib o‘tdi.

Tadbirning asosiy maqsadi Yaqin Sharq mintaqasida kechayotgan dolzarb geosiyosiy jarayonlarni chuqur o‘rganish hamda ularning Markaziy Osiyo davlatlari, xususan O‘zbekiston va mintaqaviy hamkorlik uchun ahamiyatini tahlil qilishdan iborat bo‘ldi.

Seminar davomida ishtirokchilar mintaqaviy xavfsizlikni ta’minlash, iqtisodiy hamkorlikni kengaytirish hamda transport-logistika tizimlarining integratsiyasi kabi dolzarb masalalar yuzasidan fikr almashdilar. Shuningdek, geostrategik jarayonlarning global va mintaqaviy rivojlanishga ta’siri bo‘yicha ilmiy-tahliliy fikrlar bildirildi.

Tadbirda Diplomatik akademiya va Toshkent davlat sharqshunoslik universiteti professor-o‘qituvchilari, shuningdek, JIDU doktorantlari va magistrantlari ishtirok etdilar.

2026 yil 27 aprel kuni Toshkent shahrida Uchinchi xalqaro “Yurak diplomatiyasi” mavzusidagi konferensiya o‘z ishini boshladi. Mazkur nufuzli anjuman Baskervil instituti tomonidan O‘zbekiston Yoshlar ittifoqi bilan hamkorlikda, AQSHning Yuta shtatidagi qator akademik hamda madaniy muassasalar ishtirokida tashkil etilgan.

Konferensiyaning asosiy mavzusi: “Til, adabiyot va huquq — madaniyatlararo muloqot va tinchlik barpo etish yo‘llari”. Ushbu yo‘nalish doirasida ishtirokchilar zamonaviy dunyoda o‘zaro tushunishni mustahkamlash, madaniyatlar o‘rtasidagi muloqotni rivojlantirish va barqaror tinchlikni ta’minlashga qaratilgan masalalarni muhokama qiladilar.

Anjumanda turli mamlakatlardan kelgan olimlar, amaliyotchilar va yosh yetakchilar, jumladan, Jahon iqtisodiyoti va diplomatiya universiteti huzuridagi Diplomatik akademiya vakillari ishtirok etmoqda. Konferensiya doirasida ilmiy ma’ruzalar, guruh muhokamalari va fikr almashinuv sessiyalari o‘tkazilib, ishtirokchilar o‘rtasida samarali muloqot va hamkorlik uchun imkoniyat yaratiladi.

Tashkilotchilarning ta’kidlashicha, “Yurak diplomatiyasi” konferensiyasi nafaqat ilmiy va madaniy aloqalarni mustahkamlash, balki amaliy g‘oyalar ishlab chiqish orqali global hamjihatlikni rivojlantirishga xizmat qiladi.

Ushbu anjuman xalqaro miqyosda o‘zaro ishonchni oshirish, yangi hamkorlik aloqalarini yo‘lga qo‘yish va tinch hamda o‘zaro bog‘langan jamiyatni shakllantirishda muhim ahamiyat kasb etadi.

2026-yil 14-aprel kuni Jahon iqtisodiyoti va diplomatiya universitetida hind tili bo'yicha notiqlik san’ati tanlovi bo‘lib o‘tdi. Tadbir hind tili bayrami munosabati bilan tashkil etildi.

Tanlovni JIDU rektori S.Safoyev ochib berdi. Unda Hindistonning O‘zbekistondagi Favqulodda va Muxtor elchisi Smita Pant xonim, elchixona xodimlari, professor-o‘qituvchilar hamda universitet talabalari ishtirok etdi.

Tadbir davomida talabalar hind tilida o‘z bilimlari va og‘zaki nutq mahoratlarini namoyish etdilar. Tanlov yakuniga ko‘ra eng yaxshi ishtirokchilar aniqlanib, ular Smita Pant xonim tomonidan taqdirlandi.

Mazkur tanlov talabalarning xorijiy tillarni o‘rganishga bo‘lgan chuqur qiziqishini ifodalab, O‘zbekiston va Hindiston o‘rtasidagi madaniy aloqalarni mustahkamlashga xizmat qiladi.

2026-yil 9-aprel kuni Jahon iqtisodiyoti va diplomatiya universiteti huzuridagi Diplomatik akademiyada Vengriya diplomatik akademiyasi rahbariyati bilan onlayn uchrashuv bo‘lib o‘tdi.

Mazkur uchrashuv ikki davlat diplomatik ta’lim muassasalari o‘rtasida hamkorlikni rivojlantirish, tajriba almashish hamda istiqbolli qo‘shma loyihalarni muhokama qilishga qaratildi. Tomonlar diplomatik kadrlar tayyorlash, ta’lim dasturlari va ilmiy-tadqiqot yo‘nalishlari yuzasidan fikr almashdilar. Shuningdek, tomonlar hamkorlik to‘g‘risidagi memorandum loyihasini ishlab chiqish, qo‘shma seminarlar, treninglar hamda diplomatlar uchun akademik almashinuv dasturlarini tashkil etish imkoniyatlarini ko‘rib chiqishga tayyor ekanliklarini bildirdilar.

Uchrashuv yakunida tomonlar aniq yo‘nalishlar bo‘yicha muloqotni davom ettirish, jumladan qo‘shma ilmiy tadqiqotlar o‘tkazish, ta’lim kurslarini ishlab chiqish, tajriba almashish dasturlarini amalga oshirish hamda ko‘tarilgan masalalar yuzasidan kelgusida aloqalarni davom ettirish bo‘yicha kelishuvga erishdilar.

Jahon iqtisodiyoti va diplomatiya universiteti huzuridagi Diplomatik akademiyada 2026 yil 30 - martdan 3 - aprelgacha 52 nafar Samarqand viloyati mahalliy hokimiyat organlari xodimlari va tadbirkorlik subyektlari vakillari uchun «Diplomatiya asoslari, muzokaralar olib borish texnikasi va usullari, xalqaro protokol va etiket qoidalari. AQSh bilan ishlash amaliyoti» mavzusida maxsus malaka oshirish kursi tashkil etildi.

Dastur doirasida O‘zbekiston Respublikasi tashqi siyosatining dolzarb masalalari, o‘zbek-amerika munosabatlari, iqtisodiy diplomatiya, ishbilarmonlik etikasi, muzokara jarayoni hamda diplomatik protokol va etiket qoidalariga bag‘ishlangan ma’ruzalar o‘tkazildi.

Mashg‘ulotlar 5 kun davomida gibrid formatda (onlayn/oflayn) olib borildi. O‘quv jarayoni Jahon iqtisodiyoti va diplomatiya universiteti hamda Diplomatik akademiyaning yetakchi professor va o‘qituvchilari tomonidan olib borildi.

Kurs yakunida barcha ishtirokchilarga belgilangan namunadagi sertifikatlar topshirildi.

Joriy yilning 25–26 mart kunlari Nyu-Dehli shahrida “India – Central Asia: Connectivity, Security and Sustainable Partnership in a Multipolar World” mavzusida xalqaro konferensiya bo‘lib o‘tdi. Mazkur tadbir “Hindiston – Markaziy Osiyo” jamg‘armasi tomonidan tashkil etildi.

Konferensiyada Hindiston va Markaziy Osiyo davlatlaridan taniqli diplomatlar, sobiq elchilar hamda ekspertlar ishtirok etdilar. Tadbir doirasida siyosiy hamkorlik, mintaqaviy xavfsizlik, savdo-iqtisodiy aloqalar, transport-logistika infratuzilmasi, energetika hamda madaniy-gumanitar sohalarga oid masalalar muhokama qilindi.

Jahon iqtisodiyoti va diplomatiya universiteti huzuridagi Diplomatik akademiya direktori A. Xaydarov “Central Asia and emerging multipolar order” mavzusida ma’ruza bilan ishtirok etdi. Unda Markaziy Osiyo mamlakatlari o‘rtasidagi hamkorlikning zamonaviy geosiyosiy sharoitlardagi dolzarb jihatlari hamda O‘zbekistonning xalqaro tashabbuslari yoritib berildi.

Konferensiya yakunlari Markaziy Osiyo davlatlari va Hindiston o‘rtasidagi muloqot va hamkorlikni yanada chuqurlashtirishga, shuningdek, akademik va ekspert doiralardagi aloqalarni rivojlantirishga xizmat qiladi.

Jahon iqtisodiyoti va diplomatiya universiteti huzuridagi Diplomatik akademiyada 2026-yil 2-martdan 31-martgacha O‘zbekiston Respublikasi Mudofaa vazirligi xodimlari uchun “Harbiy diplomatiya” nomli malaka oshirish kurslari tashkil etildi.

O‘quv dasturi doirasida O‘zbekistonning yangilangan tashqi siyosatining konseptual asoslari, zamonaviy xalqaro munosabatlar tendensiyalari, xalqaro va mintaqaviy xavfsizlik masalalari, muzokaralar jarayonini tashkil etish va samaradorligi, diplomatik protokol va etiket, axborot-tahliliy faoliyat, raqamli diplomatiya, shuningdek, xalqaro huquqning dolzarb muammolariga bag‘ishlangan ma’ruzalar va seminar mashg‘ulotlari o‘tkazildi.

Kurslar davomida harbiy diplomatiya masalalariga, O‘zbekiston Respublikasining xorijiy davlatlar bilan harbiy-texnik hamkorligini rivojlantirishga, respublikaning xalqaro tashkilotlardagi ishtirokiga, NATO faoliyatiga, harbiy attashe instituti hamda milliy xavfsizlikni ta’minlash tizimida harbiy diplomatiyaning roliga alohida e’tibor qaratildi.

Mashg‘ulotlar Diplomatik akademiyaning professor-o‘qituvchilari, Mudofaa vazirligi vakillari, shuningdek, O‘zbekiston Respublikasining boshqa yetakchi ixtisoslashgan tashkilotlari mutaxasislari tomonidan olib borildi.

Kurslar yakunida o‘quvchilarning o‘zlashtirish darajasini ko‘rsatuvchi yakuniy test o‘tkazilib, muvaffaqiyatli yakunlagan barcha tinglovchilarga belgilangan namunadagi sertifikatlar topshirildi.

26-mart kuni Koʻksaroy qarorgohida Oʻzbekiston Respublikasi Prezidenti Shavkat Mirziyoyev va Tojikiston Respublikasi Prezidenti Emomali Rahmon tor doirada muzokara va Oliy davlatlararo kengashning birinchi yigʻilishini oʻtkazdilar.

Davlatimiz rahbari Tojikiston Prezidentining ushbu davlat tashrifi tarixiy ahamiyatga ega boʻlib, ikki mamlakat oʻrtasidagi koʻp asrlik doʻstlik, yaxshi qoʻshnichilik va oʻzaro hurmat rishtalarini mustahkamlashda yana bir muhim qadam ekanini alohida taʼkidladi.

– Bugun biz Oliy davlatlararo kengashning birinchi yigʻilishini boshlab bermoqdamiz. Ushbu format, shubhasiz, ikki tomonlama hamkorlikni sifat jihatidan yangi bosqichga koʻtaradi, Oʻzbekiston – Tojikiston strategik sheriklik va ittifoqchilik munosabatlarini amaliy mazmun va ilgʻor tashabbuslar bilan boyitishga xizmat qiladi, – dedi Shavkat Mirziyoyev.

Hukumatlar, parlamentlar va idoralar darajasidagi faol va yaqin aloqalar mamnuniyat bilan qayd etildi.

Tashrifga tayyorgarlik doirasida Hukumatlararo komissiya yigʻilishi, sanoat koʻrgazmasi va hududlar, rektorlar, olimlar, yoshlar va tahlil markazlarining forumlari muvaffaqiyatli tashkil qilindi. Ayni paytda mamlakatimizda Tojikiston madaniyati va kinosi kunlari oʻtkazilmoqda.

Yigʻilishda tomonlar hamkorlikning yangi yoʻnalishlarini batafsil muhokama qilib, ishga solinmagan imkoniyatlardan foydalanish yoʻllarini tahlil qildilar hamda oʻzaro manfaatli Oʻzbekiston – Tojikiston hamkorligini mustahkamlashga katta surʼat bagʻishlaydigan bir qator muhim qarorlarni qabul qildilar.

Oʻzaro savdo hajmini oshirish, sanoat kooperatsiyasini ragʻbatlantirish, transport sohasida oʻzaro bogʻliqlikni mustahkamlash, suv va energetika xavfsizligini kuchaytirish choralariga alohida eʼtibor qaratildi.

Oʻtgan yili tovar ayirboshlash hajmi, eng avvalo, tayyor mahsulotlarni oʻzaro yetkazib berish hisobiga qariyb 1 milliard dollarga yetdi.

Sanoat, qurilish, qishloq xoʻjaligi, toʻqimachilik, elektrotexnika, farmatsevtika va boshqa koʻplab sohalarda qator kooperatsiya loyihalari muvaffaqiyatli amalga oshirilmoqda.

Bugungi kunda ikki mamlakat poytaxtlari oʻrtasida aviareyslar, avtobus va poyezd qatnovlari yoʻlga qoʻyilgan. Yuk tashish hajmi jadal oʻsib bormoqda.

2028-yilga kelib, oʻzaro savdoni 2 milliard dollarga yetkazish imkoniyatlari koʻrib chiqildi.

“Oybek – Fotihobod” chegaraoldi savdo markazini barpo etishni tezlashtirish, mahsulotlarni sertifikatlash va “E-Permit” ruxsatnomalarni almashish raqamli tizimlarini yoʻlga qoʻyish, chegara nazorat punktlarini modernizatsiya qilish boʻyicha erishilgan kelishuvlar bu marraga yetishga xizmat qiladi.

Bundan tashqari, togʻ-kon, energetika, qishloq xoʻjaligi, elektrotexnika, yengil sanoat, qurilish va boshqa sohalardagi loyihalarni oʻz ichiga olgan alohida Sanoat kooperatsiyasi dasturi qabul qilinmoqda.

Istiqbolli loyihalarni qoʻllab-quvvatlash uchun qoʻshma Investitsiya kompaniyasining kapitalini kengaytirish muhimligi taʼkidlandi. Shuningdek, bugun ikki mamlakat hududida yangi qoʻshma loyihalarni amalga oshirishga start beriladi.

Energetika, suv resurslarini boshqarish, transport va boshqa koʻplab sohalardagi sheriklik atroflicha koʻrib chiqilib, hamkorlik istiqbollari belgilab olindi.

Yetakchilar hududlararo aloqalarni yanada rivojlantirish, gumanitar, taʼlim va ilmiy almashinuvlarni ragʻbatlantirishga kelishib oldilar.

Yirik diasporalar mavjudligini hisobga olib, madaniy va gumanitar aloqalarni mustahkamlash boʻyicha besh yillik chora-tadbirlar rejasini qabul qilish taklif qilindi.

Davlat rahbarlari mintaqaviy kun tartibi va xalqaro siyosatning dolzarb masalalari yuzasidan fikr almashdilar.

Markaziy Osiyoda koʻp tomonlama tuzilmalar va mintaqaviy formatlar doirasida yaqin muloqot va oʻzaro qoʻllab-quvvatlashni davom ettirish muhimligi taʼkidlandi. Xavfsizlik sohasidagi hamkorlikni faollashtirish boʻyicha kelishuvga erishildi.

Yigʻilishda Hukumatlararo komissiya hamraislari – ikki mamlakat Bosh vazirlarining hamkorlikning asosiy yoʻnalishlari yuzasidan hisobotlari tinglandi.

Yakunda erishilgan kelishuvlarning toʻliq amalga oshirilishini taʼminlash uchun keng qamrovli “yoʻl xaritasi” qabul qilinishi belgilandi.

2026-yil 18-mart kuni Jahon iqtisodiyoti va diplomatiya universiteti huzuridagi Diplomatik akademiyada Fransiya Diplomatik akademiyasi rahbari, janob Didye Le Bre boshchiligidagi delegatsiya bilan ilk onlayn uchrashuv bo‘lib o‘tdi.

Mazkur uchrashuv ikki davlat diplomatik ta’lim muassasalari o‘rtasida hamkorlikni yo‘lga qo‘yish, tajriba almashish hamda istiqbolli qo‘shma loyihalarni muhokama qilishga qaratildi.

Uchrashuv davomida tomonlar diplomatik kadrlarni tayyorlash, ta’lim dasturlari, ilmiy-tadqiqot yo‘nalishlari hamda xalqaro munosabatlar sohasidagi zamonaviy tendensiyalar yuzasidan fikr almashdilar. Shuningdek, tomonlar hamkorlik to‘g‘risidagi memorandum loyihasini ishlab chiqishga kirishish, talaba va tinglovchilar uchun qo‘shma seminarlar, treninglar hamda akademik almashinuv dasturlarini tashkil etish imkoniyatlarini ko‘rib chiqishga tayyor ekanliklarini bildirdilar.

Uchrashuv yakunida aniq yo‘nalishlar bo‘yicha muloqotni davom ettirish, jumladan, qo‘shma ilmiy tadqiqotlar olib borish, ta’lim kurslarini ishlab chiqish va tajriba almashish dasturlarini amalga oshirish, shuningdek, muhokama qilingan masalalar yuzasidan aloqalarni davom ettirishga kelishib olindi.

Jahon iqtisodiyoti va diplomatiya universiteti huzuridagi Diplomatik akademiyada 2026-yil 3-fevraldan 7-martgacha O'zbekiston tashqi ishlar vazirligi tibbiy yordam uchun xorijdagi tibbiy vakolatxonalar va konsullikka uzoq muddatli xizmat safarlariga yuborilishi uchun ikki haftalik malaka kursi tashkil etildi.

O'quv dasturi O'zbekiston tashkiloti siyosatining konseptual asoslari, diplomatiyaning barqaror yo'nalishlari, zamonaviy diplomatiyada “yumshoq kuch” masalalari, xalqaro siyosatning zamonaviy tendensiyalari, muzokara jarayonini tashkil etish, diplomatiya, xavfsizlik protokoli va xizmat vazifalari bo'yicha ma'ruzalar o'tkazildi.

Shu bilan birga, 23–27-fevral kunlari haftalik ishlar tibbiy yordamning oila a'zolari hamda texnik qurilish uchun bir qator o'quv kursi tashkil etildi. Mashg'ulotlar iqtisodiy vakolatxonalar faoliyati, iqtisodiy protokol asoslari, kundalik sharoitda muomala madaniyati va xulq-atvor normalari ko'rib chiqildi.

O'quv kurslari yakunida test sinovlari o'tkazildi va o'qishni yakunlagan ishtirokchilarga davlat namunasidagi sertifikatlar topshirildi.

2026-yil 2-mart kuni JIDU konferensiya zalida S.Abdurazzoqovaning “Diplomat rafiqasi bo‘lish osonmi?” (“Легко ли быть женой дипломата”) nomli kitobi taqdimoti bo‘lib o‘tdi. Muallif taniqli diplomat va olim B.Abdurazzoqovning turmush o‘rtog‘i hisoblanadi.

Tadbir O‘zbekiston Respublikasining 1992-yil 2-mart Birlashgan Millatlar Tashkilotiga a’zo bo‘lgan kun munosabati bilan tashkil etildi.

Taqdimotda Diplomatik akademiya direktori A.Xaydarov kirish so‘zi bilan ishtirok etdi. U o‘z nutqida tadbir sanasining ramziy ahamiyatini ta’kidlab, milliy diplomatiya shakllanishi tarixini asrash va uni yosh avlodga yetkazish muhimligini qayd etdi.

Taqdimot davomida Salima Abdurazzoqova diplomatik xizmatning ko‘rinmas, ammo muhim jihatlari haqida so‘z yuritib, diplomat faoliyatida turmush o‘rtog‘i va oilaning ma’naviy tayanch sifatidagi o‘rnini alohida ta’kidladi. Shuningdek, muallif kitobning yaratilish tarixi, maqsadi hamda uning bugungi kun bilan bog‘liqligi haqida ma’lumot berdi.

Tadbir doirasida jamiyat va oilada ayollarning o‘rni, shuningdek, diplomatik xizmatning insoniy jihatlari yuzasidan fikr almashildi.

Mazkur taqdimot milliy diplomatiya tarixini yoritish hamda diplomat kasbi va oilaviy qadriyatlar uyg‘unligini muhokama qilish uchun muhim maydon bo‘lib xizmat qildi.