Fransiya Respublikasi Prezidenti Emmanuel Makron Yelisey saroyida O‘zbekiston Respublikasi Prezidenti Shavkat Mirziyoyev sharafiga davlat qabul marosimini uyushtirdi.

Qabulda ikki mamlakat rasmiy delegatsiyalari, Fransiya Bosh vaziri Fransua Bayru boshchiligida Vazirlar Mahkamasi a’zolari, taniqli madaniyat, san’at va fan arboblari, ishbilarmon doiralar va jamoatchilik vakillari ishtirok etdi.

Davlatimiz rahbari Emmanuel Makron va uning rafiqasi Brijit Makronga samimiy qabul uchun minnatdorlik bildirib, bugun bo‘lib o‘tgan muzokaralar tarixiy ahamiyatga ega ekanini, ularning natijasida mamlakatlarimiz o‘rtasidagi munosabatlar strategik sheriklik darajasiga ko‘tarilganini mamnuniyat bilan qayd etdi.

Fransiya yetakchisi bugun o‘tkazilgan muzokaralar natijalarini va imzolangan bitimlarni olqishladi.

– Bir necha yil ichida biz energetika, suv resurslarini boshqarish, kommunal xizmatlar, transport, barqaror turizm kabi muhim sohalarda uzoq muddatli hamkorlik aloqalarini o‘rnatishga erishdik. Buning dalili sifatida Fransiya hukumati va Fransiya taraqqiyot agentligi ko‘magida fransuz kompaniyalari O‘zbekistonga investitsiya kiritayotgani, hududlarda qo‘shilgan qiymat va ish o‘rinlari yaratilayotgani, yoshlar kasb o‘rganib, hayotda o‘z o‘rnini topayotganini keltirishim mumkin, – dedi Emmanuel Makron.

Tomonlar xalqlarimiz farovonligi yo‘lida O‘zbekiston-Fransiya hamkorligini yanada mustahkamlashga qat’iy intilishlarini bildirdilar.

O‘zbekiston Respublikasi Prezidenti Shavkat Mirziyoyev 12-mart kuni Fransiyaga davlat tashrifi doirasida BMTning Ta’lim, fan va madaniyat masalalari bo‘yicha tashkiloti (YUNESKO) bosh direktori Odri Azuleni qabul qildi.

BMT tizimidagi ushbu nufuzli tuzilma bilan samarali hamkorlikni yanada rivojlantirish masalalari, shuningdek, joriy yilning kuzida Samarqand shahrida tashkilot Bosh konferensiyasining 43-sessiyasiga tayyorgarlik ko‘rish va uni o‘tkazishning amaliy jihatlari muhokama qilindi.

Ko‘p qirrali sheriklik bugungi kunda yuksak darajada ekani mamnuniyat bilan qayd etildi.

O‘zbekiston tashabbusi bilan axborotdan foydalanish va bolalar ta’limi masalalari bo‘yicha rezolyutsiyalar qabul qilindi.

Mamlakatimiz Madaniy boyliklarni saqlash va restavratsiya qilish bo‘yicha xalqaro markazga a’zo bo‘ldi. Buxoro "Kreativ shaharlar tarmog‘i"ga qo‘shildi. Samarqanddagi Ipak yo‘li universitetida YUNESKO kafedrasi ochildi. O‘tgan yili ta’lim, madaniyat, raqamli va innovatsion texnologiyalar sohalarida 7 ta yangi loyihani amalga oshirish boshlandi.

Turon cho‘llari va Zarafshon-Qoraqum yo‘lagi, ipakchilik, kulolchilik, rubob chalish va iftorlik an’analari, "Buxoro amiri devonxonasi arxivi", "Turkiston albomi", "Xudoybergan Devonov fotoalbomi" YUNESKOning maxsus ro‘yxatlariga kiritildi.

Ta’kidlash joizki, Samarqand shahrida bo‘lajak Bosh konferensiyaning 43-sessiyasi so‘nggi 40 yil ichida birinchi marta YUNESKOning Parij shahridagi qarorgohidan boshqa joyda o‘tkaziladi. Bu voqea tashkilotning 80-yilligiga to‘g‘ri keladi.

Bosh direktor Odri Azule O‘zbekiston bilan sermahsul hamkorlikni yuksak baholab, bo‘lajak tadbirga keng ko‘lamli tayyorgarlik ko‘rilayotgani uchun davlatimiz rahbariga minnatdorlik bildirdi.

Amaliy hamkorlik dasturlarini yanada kengaytirish, shuningdek, YUNESKO Bosh konferensiyasining 43-sessiyasi doirasidagi forum va tadbirlarni tashkil etish bo‘yicha yaqindan hamkorlikni davom ettirishga kelishib olindi.

O‘zbekiston Respublikasi Prezidenti Shavkat Mirziyoyev Fransiya Respublikasi Prezidenti Emmanuel Makronning taklifiga binoan davlat tashrifi bilan Parij shahriga keldi.

Samolyot oldida O‘zbekiston yetakchisini Fransiya milliy ta’lim, oliy ta’lim va ilmiy tadqiqotlar vaziri Elizabet Born, Parij harbiy okrugi qo‘mondoni general Loik Mizon va boshqa rasmiy shaxslar kutib oldi.

"Orli" xalqaro aeroportida oliy martabali mehmon sharafiga ikki mamlakat davlat bayroqlari ko‘tarildi, faxriy qorovul saf tortdi.

Mamlakatimiz delegatsiyasi joylashgan qarorgoh oldida Fransiyada o‘qiyotgan, ishlayotgan va ilmiy izlanishlar olib borayotgan bir guruh vatandoshlarimiz Prezident Shavkat Mirziyoyevni katta xursandchilik bilan kutib oldi. Davlatimiz rahbari ular bilan samimiy suhbatlashdi, o‘qish va izlanishlariga muvaffaqiyat tiladi.

Tashrifning asosiy tadbirlari bugun, 12-mart kuniga mo‘ljallangan.

Dasturga muvofiq, Yelisey saroyida oliy darajadagi O‘zbekiston-Fransiya muzokaralari bo‘lib o‘tadi.

Shuningdek, davlatimiz rahbari YUNESKO bosh direktori Odri Azule bilan uchrashuv hamda Fransiyaning yetakchi kompaniya va banklari vakillari bilan davra suhbati o‘tkazadi.

O‘zbekiston Respublikasi Prezidenti Shavkat Mirziyoyev Fransiya Respublikasi Prezidenti Emmanuel Makronning taklifiga binoan 11-13-mart kunlari davlat tashrifi bilan ushbu mamlakatda bo‘ladi.

Tashrif doirasida Parij shahrida oliy darajadagi muzokara va tadbirlar, Fransiyaning rasmiy va ishbilarmon doiralari bilan qator uchrashuvlar o‘tkazilishi rejalashtirilgan.

Bo‘lajak muloqotlar kun tartibidan ko‘p qirrali O‘zbekiston-Fransiya munosabatlarini yanada rivojlantirish va mustahkamlash masalalari o‘rin olgan.

Savdo-iqtisodiy va investitsiya-moliyaviy sohalarda o‘zaro manfaatli hamkorlikni kengaytirish, Fransiyaning yetakchi kompaniya va korxonalari bilan kooperatsiya loyihalarini ilgari surishga ustuvor e’tibor qaratiladi.

Sammit yakunida hukumatlararo va idoralararo bitimlar to‘plamini qabul qilish ko‘zda tutilgan.

Bundan tashqari, davlatimiz rahbari YUNESKO Bosh direktori Odri Azule bilan uchrashib, tashkilot Bosh konferensiyasining 43-sessiyasiga tayyorgarlik ko‘rish va uni joriy yilning kuzida Samarqand shahrida o‘tkazishning amaliy jihatlarini muhokama qiladi.

Bo‘lajak tashrif arafasida ko‘plab tadbirlar o‘tkazilayotganini ta’kidlash joiz.

Xususan, 1-mart kuni Grets-Armenvil shahridagi "Uranoskop" observatoriyasi hududida buyuk alloma Abu Rayhon Beruniy siymosi aks etgan yodgorlik ochildi.

Shu kunlarda Parij shahrida sog‘liqni saqlash, fan va ta’lim, madaniyat, turizm va biznes sohalarida forum va anjumanlar o‘tkazilmoqda. Tuluza, Lion va Nitssada qo‘shma ishbilarmonlik tadbirlari bo‘lib o‘tadi.

ANQARA, 1-mart. O'zbekiston Tashqi ishlar vazirligi Jahon iqtisodiyoti va diplomatiya universiteti (JIDU) huzuridagi Diplomatik akademiya direktori Abdusamat Xaydarov amaliy safar bilan Turkiyada bo'ldi.

Safar diplomatik kadrlar tayyorlash va malakasini oshirishda Turkiya tomoni bilan hamkorlikni mustahkamlash istiqbollarini muhokama qilish maqsadida tashkil etildi.

Diplomatik akademiya direktori tashrif davomida Turkiya Tashqi ishlar vazirligi Diplomatik akademiya rahbari Mesut O'zjan bilan muzokaralar o'tkazdi.

Unda JIDU huzuridagi Diplomatik akademiya faoliyati xususida ma'lumot berildi, diplomatik kadrlar tayyorlash va malakasini oshirishda xalqaro aloqalarning muhimligi ta'kidlandi.

Mesut O'zjan Turkiya Diplomatik akademiyasi O'zbekiston tomoni bilan aloqalarni yanada kengaytirishga va qo'shma loyihalarni amalga oshirishga qiziqish bildirdi.

Tomonlar ikki davlat Diplomatik akademiyalari tomonidan amalga oshiriladigan chora-tadbirlarga doir "yo'l xaritasi"ni ishlab chiqish va qabul qilishga kelishib oldilar.

O'zbekiston Diplomatik akademiya direktori, shuningdek, Turkiya Diplomatik akademiyasi o'qituvchilari, diplomatlar va tinglovchilar ishtirokida interaktiv muloqot o'tkazdi.

Ishtirokchilarga Prezident Shavkat Mirziyoyev boshchiligida amalga oshirilayotgan O'zbekiston tashqi siyosatining mazmun-mohiyati, xalqaro va mintaqaviy hamkorlikdagi ustuvor vazifalar hamda ijobiy natijalar haqida so'zlab berildi.

Bundan tashqari, direktor Abdusamat Xaydarov Turkiyaning yetakchi tahlil markazlari rahbarlari bilan muzokaralar o'tkazdi.

Muloqotlar davomida JIDU huzuridagi Diplomatik akademiya va Turkiya "aql markazlari" o'rtasida hamkorlikni yo'lga qo'yish, dolzarb mavzularda birgalikda tadqiqotlar o'tkazish, yosh tahlilchilar salohiyatini va malakasini oshirishga kelishib olindi.

O‘zbekiston Respublikasi Prezidenti Shavkat Mirziyoyevning taklifiga binoan Pokiston Islom Respublikasi Bosh vaziri Shahboz Sharif 25-26-fevral kunlari rasmiy tashrif bilan mamlakatimizda bo‘ladi.

Bo‘lajak oliy darajadagi muzokaralar kun tartibidan O‘zbekiston-Pokiston strategik sheriklik va ko‘p qirrali hamkorlik munosabatlarini yanada rivojlantirish va kengaytirish masalalari o‘rin olgan.

O‘zaro tovar ayirboshlash hajmini oshirish, transport bog‘liqligini kuchaytirish va tranzit salohiyatini ro‘yobga chiqarish, yengil va charm sanoati, qishloq xo‘jaligi, farmatsevtika, elektrotexnika va iqtisodiyotning boshqa tarmoqlarida kooperatsiya loyihalarini ilgari surish borasidagi qo‘shma rejalar diqqat markazida bo‘ladi.

Madaniy-gumanitar va turizm aloqalarini faollashtirish masalalari ham ko‘rib chiqiladi. Xalqaro va mintaqaviy ahamiyatga molik dolzarb masalalar yuzasidan fikr almashiladi.

Sammit yakunida Qo‘shma deklaratsiya va qator ikki tomonlama hujjatlar qabul qilinishi rejalashtirilgan.

Tashrifning ishbilarmonlik dasturi doirasida yetakchilar O‘zbekiston-Pokiston qo‘shma biznes forumida ham ishtirok etadilar.

Ўзбекистон Республикаси Президенти Шавкат Мирзиёев 18 февраль куни Ал-Кувайт шаҳрига ташриф доирасида ушбу мамлакат Валиаҳди Шайх Сабоҳ ас-Сабоҳ билан учрашув ўтказди.

Ўзбекистон билан Кувайт ўртасидаги дўстлик ва кенг қамровли шериклик муносабатларини янада ривожлантириш ва мустаҳкамлаш масалалари кўриб чиқилди.

Суҳбат аввалида давлатимиз раҳбари Валиаҳдга самимий қабул ва алоҳида эътибор учун миннатдорлик билдирди.

Куни кеча бўлиб ўтган олий даражадаги тарихий музокаралар, ҳукумат аъзолари ва етакчи компаниялар билан сермаҳсул учрашувлар кўп қиррали Ўзбекистон-Кувайт муносабатларини кенгайтириш учун мустаҳкам асос бўлиши таъкидланди.

Олий ва юқори даражада яқин мулоқот ва алмашинувларни давом эттиришга келишиб олинди. Инвестицияларни жалб қилиш учун платформани тез фурсатда ишга тушириш, агросаноат мажмуи, транспорт ва логистика, соғлиқни сақлаш, таълим, фармацевтика, инфратузилма ва бошқа йўналишларда кооперация лойиҳаларини амалга оширишга келишиб олинди.

"Марказий Осиё - Кўрфаз араб давлатлари ҳамкорлик кенгаши" мулоқоти доирасидаги ташаббусларни ўзаро қўллаб-қувватлаш масалаларига алоҳида эътибор қаратилди.

Қабул қилинган барча қарор ва келишувлар ижроси устидан биргаликда назорат ўрнатиш масаласи келишиб олинди.

2025-yil 10-14 fevral kunlari Oʼzbekiston Respublikаsi Tаshqi ishlаr vаzirligi Jahon iqtisodiyoti va diplomatiya universiteti huzuridаgi Diplomаtik аkаdemiya tomonidan O‘zbekiston Respublikasi Qurolli Kuchlari akademiyasining 9 nafar magistr mutaxassislari uchun "O‘zbekiston Respublikasi tashqi siyosiy faoliyati asoslari. Diplomatik protokol, etiket va muzokaralar jarayoni" kursi tashkil etildi.

Kursning maqsadi Qurolli Kuchlari akademiyasi magistr mutaxassislarining kasbiy bilim va koʻnikmalarini chuqurlashtirish hamda Oʻzbekiston Respublikasining yangilangan tashqi siyosatining konseptual asoslari bilan batafsil tanishtirish hamda xalqaro munosabatlar va tashqi siyosati sohasida kasbiy malakasini oshirishdan iborat bo’ldi.

2025-yil 14-fevral kuni mazkur kursni muvaffaqiyatli tamomlagan tinglovchilarga ushbu kursni tamomlaganlik to‘g‘risidagi sertifikatlar topshirildi.

Matnni ingliz tilida o'qishingiz mumkin

Жорий йилнинг 30 январида Ўзбекистон Республикаси Ташқи ишлар вазирлиги Жаҳон иқтисодиёти ва дипломатия университетида  “ЎЗБЕКИСТОН ДИПЛОМАТИЯСИ ТАРИХИ” китобининг тақдимот маросими бўлиб ўтди. Гарчи китоб бундан бир неча йил аввал тайёр бўлган бўлса-да, унинг нашри кейинроқ амалга оширилиб, тақдимоти эса шу кунларда ўтказилди.

“Ўзбекистон тарихи” сериясининг VII жилдини ташкил қилган ушбу нашрда ўзбек дипломатиясининг қадимги замонлардан бошлаб бугунги кунгача – мустақил Ўзбекистон дипломатияси шаклланиши ва тараққий этишигача бўлган даврни тизимли равишда очиб беришга характ килинган.

Монографияни яратган муаллифлар жамоасининг асосий мақсади Ўзбекистон ҳудудидаги дипломатик анъаналар ва мактабларни улар амал қилган тарихий давр ва давлат тузилмаларидан қатъи назар тарихий ворисликда кўрсатишдан иборат бўлиб, улар бунга эришганлар. Ушбу рисоланинг яратилишида мамлакатимизнинг турли илмий муассасалари ва олий ўқув юртлари қатори Жаҳон иқтисодиёти ва дипломатия университети тарихчи олимлари ва мутахассислари, дипломатлари иштирок этдилар.

Тадбирда мамлакатимизда аккредитациядан ўтган  йигирмага яқин давлатлар элчилари, хорижий ваколатхоналар вакиллари, Ўзбекистон элчилари ва Ташқи ишлар вазирлиги фахрийлари, нашрни тайёрлашда фаол қатнашган муаллифлар, ҳамкор ташкилотлар намояндалари ва профессор-ўқитувчилари иштирок этди. Тақдимотда ЖИДУ ҳузуридаги Дипломатик академия ходимлари ҳам фаол иштирок этди.  

Тадбирни  Олий Мажлис Сенати раиси биричи ўринбосари, ЖИДУ ректори С.Сафоев очиб берди. Кейинги сўз китобнинг масъул муҳаррири Ўзбекистон Республикаси Президенти ҳузуридаги Хавфсизлик кенгаши котибининг ташқи сиёсат ва хавфсизлик масалалари бўйича ўринбосари А.Х. Комиловга берилди.

Навбатдаги сўз монографияни тайёрлашда координаторлик қилган олим, ҳозирда МГИМОнинг Тошкентдаги филиали директори А.Абдувахитовга берилди.  

Шунингдек янги китобнинг аҳамияти ҳақида Ўзбекистон ФА вице-президенти, Абу Райхон Беруний номидаги Шарқшунослик институти директори Б.Абдухалимов, Қозоғистон Республикасининг Ўзбекистондаги Фавқулодда ва Мухтор элчиси Бейбут Атамкулов, Ўзбекистон Республикасининг Туркиядаги Фавқулодда ва Мухтор Элчиси А.Агзамходжаев ва бошқалар сўзга чиқдилар.

O‘zbekiston Respublikasi Prezidentining 2022 yil 23 iyuldagi 330-sonli “Jahon iqtisodiyoti va diplomatiya universiteti faoliyatini tizimli isloh qilish chora-tadbirlari to‘g‘risida”gi qaroriga hamda O‘zbekiston Respublikasi Vazirlar Mahkamasining 2019 yil 23 sentabrdagi 797-sonli “Oliy ta’lim muassasalari rahbar va pedagog kadrlarining malakasini oshirish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi qaroriga muvofiq - JIDU huzuridagi Diplomatik akademiya tomonidan JIDU professor-o‘qituvchilari tarkibi uchun 2024 yil 25 dekabrdan 2025 yil 25 yanvargacha malaka oshirish kursi tashkil etildi.

Kurs to‘rt yo‘nalishni qamrab oldi: “Xalqaro munosabatlar”, “Siyosatshunoslik”, “Xalqaro huquq” va “Xalqaro iqtisod”. Ushbu malaka oshirish kursida JIDUdan 18 nafar professor-o‘qituvchilar ishtirok etdilar. Malaka oshirish kursida tinglovchilar siyosiy tahlil va bashorat, xalqaro grantlar bilan ishlash va innovatsion pedagogik texnologiyalarning nazariy asoslarini ozlashtirdilar.

Yuqoridagi kurs doirasida Hindistonning MERI Group Institutions xalqaro aloqalar markazi professori Ramakant Dvivedi va doktor Lav Agraval tomonidan “Oliy taʼlim va xalqaro munosabatlarda sunʼiy intellektni qoʻllash” mavzusida maʼruzalar oʻtkazildi. Shuningdek, JIDU o‘qituvchilari uchun Bangladeshning O‘zbekistondagi elchisi Mohammad Monirul Islom “O‘zbekiston-Bangladesh munosabatlarini rivojlantirish va mintaqalararo o‘zaro bog‘liqlik” mavzusida ma’ruza o‘qildi.

2025-yil 27 va 28-yanvar kunlari qayta tayyorlash va malaka oshirish kurslari bitiruvchilarining bitiruv malakaviy ishini himoya qilish hamda attestatsiyadan o‘tkazish bo‘lib o‘tdi. Talabalar kurslarning tashkil etilishi va mazmunini yuqori baholadilar va ularni barcha JIDU o‘qituvchilarini jalb etgan holda muntazam ravishda o‘tkazish muhimligini ta’kidladilar.

2025-yil 29-yanvar kuni malaka oshirish kursini muvaffaqiyatli tamomlagan tinglovchilarga yuqoridagi kursni tamomlaganlik to‘g‘risidagi sertifikatlar topshirildi.