Ўтган ҳафта дунё давлатлари, халқаро ташкилот ва етакчи экспертлар ҳамда нуфузли оммавий ахборот воситалари нигоҳи Ўзбекистонга қаратилди. 3-4 апрель кунлари Марказий Осиё, хусусан, Ўзбекистон учун халқаро сиёсий майдонда муҳим бурилиш нуқтасига айланувчи биринчи расмий Марказий Осиё ва Европа Иттифоқи саммити ўтказилди.

Ушбу саммит Европа Иттифоқи ва Марказий Осиё муносабатларида янги саҳифа очди. Зеро, глобал муаммолар ва йирик ўйинчиларнинг Марказий Осиёга қизиқиши ортиб бораётган бир шароитда Европа Иттифоқи барқарор ривожланиш, ўзаро боғлиқлик ва сармоявий жозибадорлик тамойиллари асосида минтақа билан ҳамкорликни кенгайтиришга интилишини намойиш этиб, икки минтақа ҳамкорлиги стратегик шериклик даражасига кўтарилди. Ўзбекистон учун мазкур саммит Европа Иттифоқи билан ҳамкорликни янги босқичга кўтариш, сармоя ва технологияларни жалб қилиш, жаҳон миқёсида ўз ўрнини мустаҳкамлаш учун ноёб имконият бўлди, десак янглишмаган бўламиз. Айтиш жоизки, Европа Иттифоқи Марказий Осиёнинг учта асосий ташқи савдо ҳамкорларидан биридир. Бундан ташқари, минтақа мамлакатларига йўналтирилган барча сармояларнинг 40 фоиздан ортиғи Европа Иттифоқига аъзо давлатлар ҳиссасига тўғри келади.

Кези келганда айтиш жоизки, бу қизиқишнинг яна бир асосий сабабларидан бири дунёда давом этаётган геосиёсий беқарорликдир. Халқаро майдонда глобал ўйинчилар ўртасидаги қарама-қаршилик Марказий Осиё каби минтақаларга қизиқишни оширмоқда. Гап шундаки, биз бир вақтнинг ўзида Россия Федерацияси ва Хитой Халқ Республикаси каби йирик давлатлар ўртасидамиз. Европа Иттифоқи яна бир глобал ўйинчи сифатида Марказий Осиё ўзининг ҳозирги статус-квосини сақлаб қолиши, четда қолиши ва “куч марказлари”га қўшилишга интилмаслигидан манфаатдор. Табиийки, Европа Иттифоқи учун бу борадаги энг яхши стратегия ўз инвестиция лойиҳалари, савдо ҳамкорликлари ва ўзининг сиёсий кафолатларини таклиф қилишдир. Шу нуқтаи назардан, муҳим тадбирнинг айнан юртимизда ўтказилиши Ўзбекистоннинг халқаро нуфузини янада оширди. Саммитга мезбонлик Ўзбекистоннинг минтақадаги етакчи давлат сифатидаги ўрнини мустаҳкамлади. Мамлакат ташқи сиёсатининг очиқ, прагматик ва мулоқотга тайёр эканини кўрсатди. 

Марказий Осиё жаҳон сиёсатининг муҳим геосиёсий ўйинчиси ва субъектига айланмоқда. Шу маънода, 27 аъзони ўзида бирлаштирган, 450 миллиондан зиёд аҳолига эга Европа Иттифоқи каби халқаро сиёсий ва иқтисодий кучлар билан мулоқотда тенг ҳуқуқли шерик сифатида иштирок этиш Ўзбекистоннинг дипломатик салоҳиятини мустаҳкамлайди. Айни сабабдан Самарқандда ўтган “Марказий Осиё – Европа Иттифоқи” биринчи саммити халқаро муносабатлар тизимида муҳим воқеа сифатида баҳоланмоқда. У нафақат икки томонлама муносабатларни мустаҳкамлайди, балки минтақавий барқарорлик, иқтисодий ўсиш ва сиёсий ҳамкорлик учун кенг имкониятлар эшигини очади. 

Европа Иттифоқи учун Марказий Осиё муҳим ҳамкор. Шу ўринда тарихга мурожаат қилсак, олий даражадаги “Марказий Осиё – Европа Иттифоқи“ форматини йўлга қўйиш ташаббуси 2022 йилда Ўзбекистон Президенти Шавкат Мирзиёев томонидан Марказий Осиё давлатлари раҳбарлари ва Европа кенгаши президенти Шарль Мишелнинг Остонадаги учрашуви чоғида илгари сурилганини алоҳида таъкидлаш керак. Бу ташаббус Ўзбекистоннинг ташқи сиёсий доктринасига мос бўлиб, унда Марказий Осиёни бирлаштириш, шунингдек, минтақада барқарор ривожланишга, шу жумладан, самарали халқаро ҳамкорликни ривожлантириш орқали эришишга қаратилган саъй-ҳаракатлар устувор ҳисобланади.

Самарқанд саммитида умумий йўналиш ва устуворликлар белгиланди. Бу савдо ва инвестиция алоқаларини мустаҳкамлаш, тоза энергия, ўта муҳим хом ашё ресурслари, транспорт-логистика имкониятларини кенгайтириш, сув ресурсларидан самарали фойдаланиш ва бошқа соҳаларни қамраб олади. Европа Иттифоқининг инвестиция стратегияси – “Global Gateway” муҳокама марказида бўлди, чунки ҳамкорликдан иккала минтақа ҳам манфаатдор. У 2027 йилгача бутун дунё бўйлаб 300 миллиард евролик давлат ва хусусий инвестицияларни жалб этиш, барқарор ўсишни қўллаб-қувватлаш, рақамли, энергетика, транспорт ўзаро алоқадорлигини мустаҳкамлаш, шунингдек, илмий-тадқиқот тизимларини ривожлантиришга қаратилган. Global Gatewayда Европа Иттифоқи билан иштирок этиш нафақат инвестицияларни жалб қилиш имконияти, балки Транскаспий халқаро транспорт йўналиши каби лойиҳалар доирасида транзит салоҳиятини мустаҳкамлаш воситасидир.

Самарқандда бўлиб ўтган мунозараларда коммуникациялар, муҳим хомашё соҳасидаги ҳамкорлик, атроф-муҳит муаммолари, сув ресурслари, иқлим ўзгариши ва албатта, яқин атрофимиздаги хавфсизлик вазияти бўйича ҳамкорлик масалалари қамраб олинди. Европа Иттифоқи ва унга аъзо давлатлар, шунингдек, жаҳон ҳамжамияти яшил иқтисодиётга ўтиш билан боғлиқ иқлим мақсадларига эришишга интилмоқда. Бу борада Марказий Осиё давлатлари, жумладан, Ўзбекистон ҳам ўз мажбуриятларини олган. Мазкур глобал муаммо ва уни биргаликда ҳал қилиш учун қайта тикланадиган энергия манбаларига ўтиш зарур. Буни ХХ асрнинг нефти деб аташ тўғрироқ бўларди. ХХІ асрда биз муҳим хом ашё деб атайдиган нарса янги муҳим саноат ҳисобланади. 

Европаликлар назарида минтақамизда ишчи кучи, энг муҳими, юқори малакали ва билимли ишчи кучи бор. Марказий Осиёда ердан қазиб олинадиган ва етиштириладиган хом ашё бор. Саноат товарлари ва тўқимачилик, шунингдек, озиқ-овқат маҳсулотлари ҳам шулар жумласидан. Европа бозорларига чиқиши мумкин бўлган ва керак бўлган маҳсулотлар мавжуд. Шу боис Европа Иттифоқи ва Марказий Осиё келажаги жуда порлоқ. Европа Иттифоқи Марказий Осиёнинг ҳар бир давлати, шунингдек, бутун минтақа билан жуда яхши ҳамкорликни йўлга қўйган. Марказий Осиё ўзини яхлит минтақа сифатида намоён этса, бу янада самарали бўлади. Яъни Марказий Осиёнинг ички интеграциялашуви улкан имкониятларни намоён этади. Европа Иттифоқи 70 йилдан кўпроқ вақт олдин кўмир ва пўлат иттифоқи сифатида бошланган ҳолда ҳозирги кунда дунёдаги энг қудратли иқтисодий ва сиёсий блоклардан бирига айланди. Марказий Осиё ҳам келажакда шундай кучга айланиши мумкин. 

Саммитда Марказий Осиё учун “Team Europe” ташаббуси доирасидаги инвестиция пакети эълон қилинди. Ушбу муҳим ҳужжат тўрт асосий йўналишга қаратилган. Транспорт, ўта муҳим хом ашё ресурслари, рақамли тармоқ, сув ва энергия транспорти боғлиқлигини ривожлантириш. 2024 йил ўтказилган Инвесторлар форумида ЕИ ва халқаро ҳамкорлар Каспий денгизи орқали ўтадиган транспорт йўлаги учун 10 миллиард евро ажратишга ваъда берди. Бу йил Европа Иттифоқи – Марказий Осиё иқтисодий форуми билан бир вақтда иккинчи Инвесторлар форуми ўтказилади. Шунингдек, ўта муҳим хом ашё ресурслари бўйича ҳамкорликни кенгайтириш ва аниқ инвестицияларни жалб қилиш режалаштирилган. Айни йўналишда Марказий Осиёда маҳаллий саноатни ривожлантириш, янги иш ўринлари яратиш ва минтақада иқтисодий тараққиётни рағбатлантириш мақсад қилинган. 

Таълим соҳасида ҳам ҳамкорлик истиқболи порлоқ. Охирги 10 йил ичида “Erasmus+” дастури доирасида 10 000 талаба ва мутахассис Европа ва Марказий Осиё ўртасидаги алмашинувда қатнашди. Бугунги кунда Ўзбекистон таълим ва кадрлар алмашинуви соҳасида ҳам Европа Иттифоқининг етакчи давлатлари билан ҳамкорлик қилиб келмоқда. Ҳозирда Тошкент шаҳрида Италиянинг Турин политехника университети, Германиянинг Гёте институти филиаллари фаолият кўрсатмоқда. Қолаверса, Президент Шавкат Мирзиёевнинг март ойида Францияга амалга оширган ташрифи доирасида Ўзбекистон – Франция университетини ташкил этиш тўғрисида ҳукуматлараро битим ҳамда француз тилини ўқитишни кенгайтириш тўғрисида баённома имзоланган эди. Шу боис, таълим, фан ва ёшлар сиёсатини ривожлантиришда ҳам саммит доирасида самарали платформалар яратиш кўзда тутилди. Мисол учун Erasmus+, Horizon Europe каби дастурларда Ўзбекистон иштирокини кенгайтириш, таълим ва кадрлар тайёрлаш, академик алмашинувлар, тил ўрганиш ва инновацион тадқиқотлар соҳаларида Европа Иттифоқи тажрибаси шулар жумласидандир.

Энди “яшил” ва рақамли ўзгаришлар ҳамкорлик марказида турибди. Марказий Осиё тоза технологиялар учун энг зарур хом ашё ресурсларига, улкан салоҳиятга эга. Европа фақат хом ашёни олиб кетиш эмас, балки тўлиқ қиймат занжирини яратиш, яъни қазиб олишдан қайта ишлаш ва қайта тиклашгача бўлган жараённи шакллантиришни мақсад қилади. Бу эса маҳаллий иш ўринлари яратиш, юқори экологик ва ижтимоий стандартни таъминлашда муҳим аҳамият касб этади. Айни пайтда Ўзбекистон ва минтақадаги бошқа давлатлар қайта тикланувчи энергетика салоҳиятини фаол кенгайтирмоқда. Масалан, мамлакатмизда фаолият юритаётган 14 та янги қуёш ва шамол электр станцияларига қўшимча равишда умумий қуввати 24 минг мегаватт бўлган 50 дан ортиқ шундай лойиҳани амалга ошириш мақсадлари ҳақида давлатимиз раҳбари “Euronews”га берган интервьюсида тўхталиб ўтди. Боз устига, яқин беш йилда қайта тикланувчи энергия манбалари улушини 54 фоизга етказиш режалаштирилган. Бу иссиқхона газлари чиқишини қарийб 16 миллион тоннага қисқартириш имконини беради ва Ўзбекистон Париж келишуви доирасида иссиқхона газлари чиқиндисини 35 фоизга камайтириш бўйича ўз зиммасига олган мажбуриятларнинг муддатидан олдин бажарилишига имкон беради. 

Хавфсизлик ҳам устувор масалалардан бири. Европа Иттифоқи ва Марказий Осиё терроризмга қарши курашда ҳамкорликни чуқурлаштиради, хавфсизлик бўйича махсус мулоқотни йўлга қўяди. Ҳудудий хавфсизликни таъминлаш Марказий Осиё мамлакатлари учун ҳар доим устувор йўналиш бўлиб келган ва шундай бўлиб қолмоқда. Шу сабабли, 2023 йилда Марказий Осиё ва Европа Иттифоқи давлатлари ўртасида бу соҳадаги ҳамкорликнинг янги кун тартибини экспертлар муҳокамасига олиб чиқиш вазифаси кун тартибига қўйилди. Таъкидлаш жоизки, Марказий Осиё ҳам, Европа Иттифоқи ҳам хавфсизлик соҳасида, жумладан, терроризм, экстремизм ва трансмиллий жиноятчиликка, гиёҳванд моддаларнинг ноқонуний айланмасига қарши кураш масалаларида умумий таҳдид ва хатарларга дуч келмоқда. Шу нуқтаи назардан, Европа Иттифоқи билан хавфсизлик соҳасидаги ҳамкорлик ўзаро муносабатларимизнинг асосий йўналишларидан биридир. 

Марказий Осиё нафақат Европа томонидан талаб, балки алмаштириб бўлмайдиган ҳамкорга айланиб бормоқда. Германия ва Франция каби Европанинг йирик давлатлари Марказий Осиё билан икки томонлама даражада алмашувини кучайтирмоқда ва Европа Иттифоқининг бошқа аъзолари ўртасида икки томонлама келишувлар сони сезиларли даражада ошди. Сўнгги йилларда Франция ва Германия асосий эътиборни Қозоғистон ва Ўзбекистонга қаратган. Бу борада Остона ва Тошкент Европага кўп нарсаларни таклиф қилади. 

Биринчи саммит якунида икки минтақа ўртасида стратегик шериклик ўрнатишни назарда тутувчи Қўшма декларация ва ўта муҳим минераллар соҳасида ҳамкорлик тўғрисида декларация қабул қилиниши саммитнинг асосий натижаларидан бири бўлди. Бу ҳужжат томонларнинг стратегик шериклик ўрнатишга бўлган умумий интилишини акс эттирди. Декларация нафaқат эришилган келишувларни мустаҳкамлайди, балки минтақаларимиз ўртасидаги алоқаларни чуқурлаштириш учун асос яратади. 

Абдурафиқ Ҳошимов, 

Жаҳон иқтисодиёти ва дипломатия 

университети ҳузуридаги Дипломатия академияси кафедра мудири

Matnni rus tilida o'qishingiz mumkin

O‘zbekiston bilan Tojikiston o‘rtasida Ittifoqchilik munosabatlari to‘g‘risidagi shartnoma kuchga kirdi.

Muhim ahamiyatga ega boʻlgan uch tomonlama Sammitda Prezidentlar chegara masalalarini hal etish muhimligini taʼkidlab. Davlat chegaralarining tutashgan nuqtasi toʻgʻrisidagi shartnomani imzoladilar.

Ushbu tadbirlarning yakuni uch davlat o‘rtasidagi mustahkam rishtalar va hamkorlik ruhini ifodalovchi uch chegara hududida Do‘stlik stelasining ochilishi bo‘ldi. Bu yodgorlik tinchlik, o‘zaro hurmat va umumiy farovonlikka intilayotganimizdan dalolatdir.

Ushbu jarayonlar Markaziy Osiyoda hamkorlikning yangi davrini koʻrsatib, mintaqaviy integratsiyani kuchaytirish va umumiy taraqqiyotga yoʻl ochadi.

2025-yil 28-mart kuni Birlashgan Millatlar Tashkilotining Giyohvand moddalar va jinoyat bo‘yicha boshqarmasining (UNODC) Markaziy Osiyo, Afg‘oniston, Eron va Pokistondagi mintaqaviy vakili O.Stolpe JIDU huzuridagi Diplomatik akademiyada “Markaziy Osiyoda giyohvandlik, jinoyat, korrupsiya va terrorizmga qarshi kurashda duch kelayotgan asosiy muammolar va ushbu muammolarni hal qilishda hukumatning sa’y-harakatlarini qo‘llab-quvvatlash bo‘yicha BMTning giyohvandlik va jinoyatchilik bo‘yicha boshqarmasi tomonidan ko‘rilayotgan chora-tadbirlar” mavzusida ma’ruza o‘qidi.

Uyushgan jinoyatchilikka qarshi kurashishda qonun ustuvorligi va xalqaro hamkorlikni mustahkamlash masalalariga alohida e’tibor qaratildi.

Uchrashuvda Diplomatik Akademiyaning professor-o‘qituvchilari va magistrantlari hamda JIDU talabalari va doktorantlari ishtirok etishdi. Ma’ruza tinglovchilarda keng qiziqish va faol muhokamalarga sabab bo‘ldi, bu ko‘tarilgan mavzuning dolzarbligini va mintaqaviy xavfsizlik sohasida hamkorlikni yanada rivojlantirish zarurligini tasdiqlaydi.

2025-йил 28-март куни соат 11:00да ЖИДУ ҳузуридаги Дипломатик академияда БМТнинг Гиёҳвандлик ва жиноятчилик бўйича бошқармаси (UNODC) Минтақавий ваколатхонаси раҳбари О. Штольпе билан учрашув бўлиб ўтади.

Учрашув доирасида Минтақавий ваколатхонаси раҳбари “Марказий Осиёда гиёҳвандлик, жиноятчилик, коррупция ва терроризмга қарши курашда дуч келаётган асосий муаммолар ва ушбу муаммоларни ҳал қилишда Ҳукуматнинг саъй-ҳаракатларини қўллаб-қувватлаш бўйича БМТнинг Гиёҳвандлик ва жиноятчилик бўйича бошқармаси томонидан кўрилаётган чора-тадбирлар” мавзусида тақдимот ўтказади (“Key challenges facing Central Asia in the areas of drugs, crime,corruption and terrorism and UNODC ongoing programme portfolio in support of Government`s efforts to address these challenges”).

2025-yil 25-mart kuni JIDU huzuridagi Diplomatik akademiyada Italiya xalqaro munosabatlar jamiyati (SIOI) vakillari bilan birinchi qo‘shma onlayn uchrashuv bo‘lib o‘tdi, unda Diplomatik akademiyaning professor-o‘qituvchilari va magistratura talabalari hamda JIDU doktorantlari va talabalari ishtirok etdilar. Italiya tomonidan Elchi Mauritsio Menni, professor Gulio Pecora va SIOI xodimlari qatnashdi.

Taqdimot davomida SIOI vakillari Italiyaning Yevropa Ittifoqi faoliyatidagi rolini ta’kidladilar. Shuningdek, Italiyaning Markaziy Osiyo davlatlari bilan yaxshi munosabatlarga ega ekanligi va ayni paytda ushbu davlatlar bilan qayta tiklanadigan energiya manbalarini barpo etish borasida hamkorlikda ish olib borayotgani ta’kidlandi.

Shu bilan birga, italiyalik diplomatlar tomonidan yosh diplomatlarga mamlakat imijini shakllantirish bo‘yicha maslahatlar berildi. SIOI ekspertlari O‘zbekiston tarixiy nuqtai nazardan qiziqarli mamlakat ekanligini ta’kidladilar. Mamlakatning shuhratini oshirish maqsadida ommaviy axborot vositalaridan muayyan davlat haqidagi jamiyat fikrini shakllantiruvchi vosita sifatida faol foydalanish taklif etildi. SIOI vakillari, shuningdek, Italiya va O‘zbekiston o‘rtasidagi hamkorlikning mintaqaviy va global miqyosdagi muhimligini qayd etdilar.

Diplomatik akademiyaning Diplomatik kadrlarni qayta tayyorlash va ularning malakasini oshirish fakulteti dekani I.Fayzullayev o’zining O‘zbekiston Respublikasining yangilangan tashqi siyosatiga bag‘ishlangan ma’ruzasida Respublikamizning xorijiy davlatlar bilan hamkorlik qilishga tayyorligi va ochiqligini ta’kidladi.

2025 yil 25 mart kuni JIDU huzuridagi Diplomatik akademiyada, soat 15:00 da B bino 210 xonada, Italiyaning SIOI vakillari tomonidan “Italy and Uzbekistan 2030 Strategy – Bringing Efforts Together” mavzusida onlayn ma’ruza bo‘ladi.

Toshkent shahridagi “Yangi O‘zbekiston” bog‘ida 21-mart kuni Navro‘z tantanasi bo‘lib o‘tdi. O‘zbekiston Respublikasi Prezidenti Shavkat Mirziyoyev nutq so‘zlab, xalqimizni bayram bilan muborakbod etdi.

– Bu yilgi Navro‘z muqaddas Ramazon oyida, uning tabarruk fazilatlariga uyg‘un holda o‘tayotgani bayramga alohida ruh, o‘zgacha fayz va quvonch bag‘ishlamoqda. Qalblarimiz shodlikka to‘lgan shunday barokatli kunlarda yurtimiz mo‘min-musulmonlarini, butun islom ummatini Ramazoni sharif bilan yana bir bor qutlab, jamiki pok niyatlarimiz ijobat bo‘lishini tilaymiz, – dedi Shavkat Mirziyoyev.

Davlatimiz rahbari xorijiy mamlakatlarda ona yurt mehri va sog‘inchi bilan yashayotgan vatandoshlarimizni ham tabriklab, samimiy tilaklarini izhor etdi.

Navro‘z 3 ming yillik davlatchiligimiz tarixida o‘zining beqiyos ma’naviy ahamiyati bilan hamisha alohida e’tibor topgan buyuk bayram ekani ta’kidlandi. Bu ayyomning betakror go‘zalligi, insonparvarlik ruhi va teran falsafasi globallashuv davrida ham butun bashariyatni hayratga solayotgani uning azaliy mohiyati va hayotbaxsh kuchidan dalolat beradi.

Navro‘zda mujassam bo‘lgan bunyodkorlik ruhi Yangi O‘zbekistonimizda amalga oshirilayotgan ulkan islohotlar va jadal o‘zgarishlarning asl mazmuni va ezgu g‘oyalariga hamohangdir. Mamlakatimizda inson qadrini ulug‘lash, ijtimoiy adolat tamoyillarini mustahkamlash, aholi daromadlari va turmush darajasini yuksaltirish yo‘lida qat’iy qadamlar qo‘yilmoqda.

Yurtimizda ko‘plab zamonaviy sanoat majmualari, infratuzilma va logistika tarmoqlari, yangi imorat va uy-joylar, bog‘cha va maktablar, oliygohlar, shifoxonalar, madaniyat va sport maskanlari bunyod etilmoqda. Shahar va qishloqlarimiz, butun yurtimiz obod bo‘lib bormoqda.

“Yashil makon” umummilliy loyihasi doirasida diyorimizda yangi ekologik muhit yaratilmoqda. “Atrof-muhitni asrash va “yashil” iqtisodiyot yili” davlat dasturi doirasida bu jarayon yanada keng ko‘lam kasb etmoqda.

Prezidentimiz nutqida yoshlar siyosatiga ham to‘xtalib, ular Yangi O‘zbekistonning ilg‘or va qudratli kuchiga aylanib borayotganini ta’kidladi. Ulkan natijalarga erishib, yurtimiz rivoji va obro‘sini oshirayotgan aql-idrokli, bilim va malakali, serg‘ayrat va ishbilarmon o‘g‘il-qizlarni sharafladi.

– Aziz farzandlarim, sizlar Vatanimiz osmonida yorqin yulduzlar bo‘lib porlaydigan vaqt keldi. Yurtimizdagi beqiyos imkoniyatlarni amaliy natijalarga aylantirish uchun tinimsiz harakat qiling! Hech qachon unutmangki, ortingizda salkam 38 millionlik buyuk xalq, Prezident turibdi, – dedi Shavkat Mirziyoyev.

Navro‘zning gashti, jozibasi, ayniqsa, mahallalarda o‘tayotgan xalq sayillarida yaqqol seziladi. Milliy an’analarimiz o‘chog‘i bo‘lgan mahalla tizimining hayotimizdagi o‘rni va ta’siri tobora ortib bormoqda. Yoshlar tarbiyasi, osoyishtalikni ta’minlash, kambag‘allikni qisqartirish, aholini tadbirkorlikka jalb etish, ijtimoiy himoya va xotin-qizlar faolligini kuchaytirish, ekologiya va obodlik kabi biri-biridan muhim vazifalar mahallaning o‘zida hal etilmoqda.

Fursatdan foydalanib, davlatimiz rahbari 22-mart – Mahalla tizimi xodimlari kuni bilan barcha mahalla faollarini samimiy tabrikladi.

Navro‘z bag‘rikenglik va ahillik ruhi bilan yurtimizdagi barcha millat va elat vakillari uchun sevimli, tom ma’noda umumxalq bayramiga aylangan. Shu ma’noda, Prezidentimiz butun xalqimizga murojaat qildi:

– Bizning kuchimiz – birlik va ahillikda, qudratimiz – Vatanga mehr va sadoqatda, yutug‘imiz – o‘zimizga bo‘lgan yuksak ishonchimizda!

Umumbashariy mohiyati tufayli Navro‘z Birlashgan Millatlar Tashkiloti tomonidan xalqaro bayram sifatida e’tirof etilgan. Bu qadriyat Sharqdagi ko‘plab el-u elatlarni, jumladan, Markaziy Osiyo xalqlarini yanada jipslashtirmoqda. Shu oy oxirida qadimiy Xo‘jand shahrida O‘zbekiston, Tojikiston va Qirg‘iziston yetakchilarining uch tomonlama uchrashuvi o‘zaro ahillik yo‘lida yana bir amaliy qadam bo‘ladi.

Davlatimiz rahbari bayramda ishtirok etayotgan elchilar va xalqaro tashkilotlar vakillarini xalqaro Navro‘z kuni bilan qutlab, ularning xalqlariga do‘stlik salomini yo‘lladi.

Bayram katta konsert dasturi bilan davom etdi. Unda yurtimiz san’atkorlaridan tashqari Turkiya, Turkmaniston, Ozarbayjon, Qozog‘iston, Qirg‘iziston, Tojikiston kabi qardosh o‘lkalarning taniqli xonandalari ham qatnashgani diqqatga sazavor bo‘ldi.

“Yangi O‘zbekiston” bog‘i bayram shukuhiga burkangan. Maydonchalar alvon gullar va bayroqlar bilan bezatilgan. Milliy madaniyat markazlarining ko‘rgazmalarida yurtimizdagi totuvlik va boy madaniy xilma-xillik namoyon.

Davlatimiz rahbari ushbu ko‘rgazmalarni va folklor-etnografik jamoalarning kuy-qo‘shiqlarini tomosha qildi.

Navro‘z sayillari yurtimizning barcha go‘shalarida davom etmoqda. Dehqonlar xalqimizning rizq-ro‘zi umidida yerga baraka urug‘lari ekmoqda. Mahallalarda obodonchilik, mehr-muruvvat tadbirlari o‘tkazilmoqda.

Жорий йилнинг 19 март куни Жаҳон иқтисодиёти ва дипломатия университетида илмий, академик ва сиёсий доираларда тобора оммалашиб бораётган “Ватан” ижтимоий-сиёсий, илмий маърифий журналининг инглиз тилидаги махсус сонининг тақдимоти ўтказилди.

Унда Ўзбекистон Республикаси Президенти Администрацияси, Ташқи ишлар вазирлиги, Ўзбекистон касаба уюшмалари Федерацияси вакиллари, фахрий дипломатлар, Ўзбекистоннинг хориждаги дипломатик корпуси ва ваколатхоналари раҳбарлари (видеоконференцалоқа орқали), Ўзбекистон Республикаси Олий Мажлис Сенати аъзолари, шунингдек, илмий ва академик муассасалар, халқаро ташкилотлар, етакчи хорижий ва маҳаллий ОАВ вакиллари, ЖИДУ профессор-ўқитувчилари, талабалари иштирок этди.

Тадбирни Олий Мажлис Сенати Раисининг биринчи ўринбосари, ЖИДУ ректори Содиқ Сафоев очар экан, ушбу нашрнинг аҳамиятини таъкидлаб, журнал ички ва ташқи сиёсат, иқтисодиёт, маданият, санъат ва тарих соҳаларидаги муҳим масалаларни муҳокама ва таҳлил қилиш минбарига айланганини қайд этди.

Журналнинг инглиз тилида чоп этилиши эса Янги Ўзбекистон қиёфасини илмий-академик форматда халқаро ҳамжамиятга намойиш этишда муҳим воситага айланмоқда.

Ўзбекистон Олий Мажлис Сенати аъзоси, журнал бош муҳаррири Ҳусан Эрматов ўз сўзида “Ватан” журнали олимлар, сиёсатчилар, илмий тадқиқотчилар, таҳлилчилар учун ўз ғоя ва қарашларини ифода этишда яқин кўмакчи ўлароқ майдонга чиққанини айтиб, нашр барча учун очиқ эканлигини таъкидлади.

Тадбир давомида меҳмонлар журналнинг инглиз тилидаги махсус сонининг видео тақдимоти билан танишдилар.

Ўзбекистон касаба уюшмалари Федерацияси муассислигида чоп этилаётган ушбу журнал Президент Шавкат Мирзиёевнинг миллий контент яратиш хусусидаги топшириқлари ўлароқ дунёга келган.

Журнал саҳифаларидан Ўзбекистоннинг ижтимоий-иқтисодий тараққиёти, минтақавий ҳамкорлиги ва халқаро майдондаги ўрни, тарихи, бугуни ва эртаси борасида кенг ва чуқур мушоҳада билан ёзилган мақолалар ўрин олган.

Инглиз тилидаги махсус сон саҳифалари озарбайжон шоири Акиф Бағирнинг “Ўзбек келаётир…” номли тантанавор шеъри билан бошланади.

Саҳифаларда Қудратилла Рафиқовнинг «Ўзбекистондан Янги Ўзбекистонгача йўқотилган қалбни излаб», Фарҳод Толиповнинг «Марказий Осиё минтақавий интеграция концепцияси, модели ва динамикаси», Ғайбулла Бобоёров ва Фарҳод Мақсудовнинг «“Ўзбек” этноними: Миллатимиз номи қандай пайдо бўлган?», Элмира Гулнинг «Нақшларга сингган халқтафаккури», Сергей Абашиннинг «Колонизация ва постколонизация: Марказий Осиё мамлакатлари тажрибаси», Жамшид Муслимовнинг «Миллат: Биз уни қандай тушунамиз ёки тушунмоғимиз керак?», Шамсиддин Камолиддиннинг «Тарихий хариталарда Ўзбекистон» сарлавҳали мақолалари чоп этилган.

Тақдимотда ҳар бир меҳмонга “Ватан” журналининг махсус сони

тақдим этилди.

Тадбир “Наврўз” сайлига уланиб кетди.

Fransiya Respublikasi Prezidenti Emmanuel Makron Yelisey saroyida O‘zbekiston Respublikasi Prezidenti Shavkat Mirziyoyev sharafiga davlat qabul marosimini uyushtirdi.

Qabulda ikki mamlakat rasmiy delegatsiyalari, Fransiya Bosh vaziri Fransua Bayru boshchiligida Vazirlar Mahkamasi a’zolari, taniqli madaniyat, san’at va fan arboblari, ishbilarmon doiralar va jamoatchilik vakillari ishtirok etdi.

Davlatimiz rahbari Emmanuel Makron va uning rafiqasi Brijit Makronga samimiy qabul uchun minnatdorlik bildirib, bugun bo‘lib o‘tgan muzokaralar tarixiy ahamiyatga ega ekanini, ularning natijasida mamlakatlarimiz o‘rtasidagi munosabatlar strategik sheriklik darajasiga ko‘tarilganini mamnuniyat bilan qayd etdi.

Fransiya yetakchisi bugun o‘tkazilgan muzokaralar natijalarini va imzolangan bitimlarni olqishladi.

– Bir necha yil ichida biz energetika, suv resurslarini boshqarish, kommunal xizmatlar, transport, barqaror turizm kabi muhim sohalarda uzoq muddatli hamkorlik aloqalarini o‘rnatishga erishdik. Buning dalili sifatida Fransiya hukumati va Fransiya taraqqiyot agentligi ko‘magida fransuz kompaniyalari O‘zbekistonga investitsiya kiritayotgani, hududlarda qo‘shilgan qiymat va ish o‘rinlari yaratilayotgani, yoshlar kasb o‘rganib, hayotda o‘z o‘rnini topayotganini keltirishim mumkin, – dedi Emmanuel Makron.

Tomonlar xalqlarimiz farovonligi yo‘lida O‘zbekiston-Fransiya hamkorligini yanada mustahkamlashga qat’iy intilishlarini bildirdilar.

O‘zbekiston Respublikasi Prezidenti Shavkat Mirziyoyev 12-mart kuni Fransiyaga davlat tashrifi doirasida BMTning Ta’lim, fan va madaniyat masalalari bo‘yicha tashkiloti (YUNESKO) bosh direktori Odri Azuleni qabul qildi.

BMT tizimidagi ushbu nufuzli tuzilma bilan samarali hamkorlikni yanada rivojlantirish masalalari, shuningdek, joriy yilning kuzida Samarqand shahrida tashkilot Bosh konferensiyasining 43-sessiyasiga tayyorgarlik ko‘rish va uni o‘tkazishning amaliy jihatlari muhokama qilindi.

Ko‘p qirrali sheriklik bugungi kunda yuksak darajada ekani mamnuniyat bilan qayd etildi.

O‘zbekiston tashabbusi bilan axborotdan foydalanish va bolalar ta’limi masalalari bo‘yicha rezolyutsiyalar qabul qilindi.

Mamlakatimiz Madaniy boyliklarni saqlash va restavratsiya qilish bo‘yicha xalqaro markazga a’zo bo‘ldi. Buxoro "Kreativ shaharlar tarmog‘i"ga qo‘shildi. Samarqanddagi Ipak yo‘li universitetida YUNESKO kafedrasi ochildi. O‘tgan yili ta’lim, madaniyat, raqamli va innovatsion texnologiyalar sohalarida 7 ta yangi loyihani amalga oshirish boshlandi.

Turon cho‘llari va Zarafshon-Qoraqum yo‘lagi, ipakchilik, kulolchilik, rubob chalish va iftorlik an’analari, "Buxoro amiri devonxonasi arxivi", "Turkiston albomi", "Xudoybergan Devonov fotoalbomi" YUNESKOning maxsus ro‘yxatlariga kiritildi.

Ta’kidlash joizki, Samarqand shahrida bo‘lajak Bosh konferensiyaning 43-sessiyasi so‘nggi 40 yil ichida birinchi marta YUNESKOning Parij shahridagi qarorgohidan boshqa joyda o‘tkaziladi. Bu voqea tashkilotning 80-yilligiga to‘g‘ri keladi.

Bosh direktor Odri Azule O‘zbekiston bilan sermahsul hamkorlikni yuksak baholab, bo‘lajak tadbirga keng ko‘lamli tayyorgarlik ko‘rilayotgani uchun davlatimiz rahbariga minnatdorlik bildirdi.

Amaliy hamkorlik dasturlarini yanada kengaytirish, shuningdek, YUNESKO Bosh konferensiyasining 43-sessiyasi doirasidagi forum va tadbirlarni tashkil etish bo‘yicha yaqindan hamkorlikni davom ettirishga kelishib olindi.

O‘zbekiston Respublikasi Prezidenti Shavkat Mirziyoyev Fransiya Respublikasi Prezidenti Emmanuel Makronning taklifiga binoan davlat tashrifi bilan Parij shahriga keldi.

Samolyot oldida O‘zbekiston yetakchisini Fransiya milliy ta’lim, oliy ta’lim va ilmiy tadqiqotlar vaziri Elizabet Born, Parij harbiy okrugi qo‘mondoni general Loik Mizon va boshqa rasmiy shaxslar kutib oldi.

"Orli" xalqaro aeroportida oliy martabali mehmon sharafiga ikki mamlakat davlat bayroqlari ko‘tarildi, faxriy qorovul saf tortdi.

Mamlakatimiz delegatsiyasi joylashgan qarorgoh oldida Fransiyada o‘qiyotgan, ishlayotgan va ilmiy izlanishlar olib borayotgan bir guruh vatandoshlarimiz Prezident Shavkat Mirziyoyevni katta xursandchilik bilan kutib oldi. Davlatimiz rahbari ular bilan samimiy suhbatlashdi, o‘qish va izlanishlariga muvaffaqiyat tiladi.

Tashrifning asosiy tadbirlari bugun, 12-mart kuniga mo‘ljallangan.

Dasturga muvofiq, Yelisey saroyida oliy darajadagi O‘zbekiston-Fransiya muzokaralari bo‘lib o‘tadi.

Shuningdek, davlatimiz rahbari YUNESKO bosh direktori Odri Azule bilan uchrashuv hamda Fransiyaning yetakchi kompaniya va banklari vakillari bilan davra suhbati o‘tkazadi.